Gec oldu, amma güc olmadı: Paşinyan xəyali Ermənistandan imtina etdi
Ermənistanın Baş naziri Nikol Paşinyan ötən günlərdə Kornidzor kəndində ictimaiyyət nümayəndələri ilə görüş zamanı Qarabağla bağlı diqqətçəkən açıqlamalar verib. O, erməni cəmiyyətində “itirildiyi” iddia olunan torpaqlarla bağlı fikirlərə cavab olaraq Qarabağın heç vaxt Ermənistana məxsus olmadığını bildirib. Paşinyan qeyd edib ki, həmin ərazilərdə Ermənistan tərəfindən nə yaşayış qurulub, nə də normal infrastruktur yaradılıb. Baş nazir çıxışında “Bu torpaq necə bizim ola bilərdi?” sualını səsləndirərək mövcud yanaşmaları tənqid edib. O, həmçinin Qarabağ məsələsi ilə bağlı illərlə formalaşdırılan düşüncələrin Ermənistanı ağır nəticələrlə üz-üzə qoyduğunu vurğulayıb. Paşinyanın bu açıqlamaları Ermənistan cəmiyyətində və siyasi dairələrdə geniş müzakirələrə səbəb olub.
Politoloq Oktay Qasımov Crossmedia.az-a sözügedən açıqlamanı şərh edib.
O, bu açıqlamaların kifayət qədər diqqətçəkici olduğunu və Paşinyanın digər erməni siyasətçilərindən fərqini ortaya qoyduğunu bildirib: "Vaxtilə “Qarabağ Ermənistandır” deyən Paşinyan yaranmış reallıqları və beynəlxalq hüququ da nəzərə alaraq konstruktiv mövqe sərgiləyir və çox gözəl bilir ki, Qarabağ tarixən, hüquqi baxımdan hər zaman Azərbaycanın ərazisi olub. Belə ki, Qarabağın işğal edilməsi heç də bu torpaqların Ermənistan olması demək deyildir. Nəzərə almalıyıq ki, hələ 1993-cü ildən başlayaraq qəbul olunan bütün beynəlxalq sənədlərdə Qarabağ ərazisi Azərbaycanın ayrılmaz hissəsi kimi təsbit olunub. O cümlədən BMT-nin dörd qətnaməsində, həmçinin 1996-cı ilin Lissabon Sammitində də bu məsələlər önə çıxarılıb. Yəni, Paşinyan bu reallıqları gördüyündən və zərərli “miatsum” ideyasının bundan sonra davam etdirilməsinin Ermənistan üçün ağır nəticələrə gətirib çıxaracağını çox gözəl başa düşdüyündən doğru olaraq artıq Azərbaycanla və o cümlədən Türkiyə ilə normal münasibətlərin qurulmasının Ermənistanın gələcəyi üçün olduqca vacib olduğunu dərk edir. Həmçinin, onun səsləndirdiyi bir çox fikirlər də həqiqəti əks etdirir. Həqiqətən də, 30 illik işğal dövründə Ermənistan həmin ərazilərdə hansısa bir abadlıq işləri görmədi, əksinə, bu ərazilər dağıdıldı, talan edildi, viran qoyuldu və bütün yaşayış məntəqələri demək olar ki, yer üzündən silindi. Burada bir qrup hərbi cinayətkarların və Ermənistanın siyasi mafiozlarının maraqları təmin olundu. Onlar burada təsərrüfatlar saldılar, yaşayış məntəqələrinin sökülərək tikinti materiallarının satışından, o cümlədən dəmir yollarının, relslərin sökülüb satılmasından küllü miqdarda vəsaitlər əldə edərək varlandılar. Paşinyan da bunu diqqətə çatdırır".
Politoloqun fikrincə, bu cür bəyanatlar verməsi onu əsaslandırır ki, Paşinyan son bir neçə ildə xəyali Ermənistandan əl çəkib, real Ermənistan üzərində düşünməyin vaxtının çatdığını erməni cəmiyyətinə bildirir: "Bununla da xəyali Ermənistan ideyasının və bunun uğrunda mübarizənin hazırkı Ermənistan Respublikasının dövlət kimi mövcudluğuna ciddi təhdidlər yaratdığını cəmiyyətə başa salmaq istəyir. Bu baxımdan Paşinyanın bu açıqlamalarının onun seçki kampaniyasının tezisləri ilə üst-üstə düşdüyünü söyləmək mümkündür. Bu, onu göstərir ki, Paşinyan doğrudan da, Azərbaycan və Türkiyə ilə münasibətlərin normallaşmasını rasional baxımdan qəbul edir. Eyni zamanda bunun Ermənistana hansı faydalar gətirəcəyini bildiyindən məhz bu istiqamətdə fəaliyyət göstərir".
Fatimə Məmmədova
18:22 12.05.2026
Oxunuş sayı: 50
