Xarici xəbərlər
Husilərin Səudiyyə Ərəbistanına atdığı iki ballistik raket məhv edilib məhv edilib
Səudiyyə Ərəbistanının paytaxtı Ər-Riyad və Nəcran şəhərlərində mümkün təhlükə ilə əlaqədar erkən xəbərdarlıq sistemi işə salınıb, husilərin atdığı iki ballistik raket isə hava hücumundan müdafiə sistemləri tərəfindən zərərsizləşdirilib.
Crossmedia.az xəbər verir ki, “Anadolu” agentliyi bu barədə məlumat yayıb.
Səudiyyə Ərəbistanının Mülki Müdafiə İdarəsinin “X” sosial şəbəkə hesabında yayılan açıqlamalarda Ər-Riyad və Nəcran şəhərlərində mümkün təhlükəyə qarşı erkən xəbərdarlıq sisteminin aktivləşdirildiyi bildirilib.
Şahidlərin sözlərinə görə, Ər-Riyadda hava hücumundan müdafiə sistemlərinin işə düşməsindən sonra bir neçə partlayış səsi eşidilib.
Mülki Müdafiə İdarəsinin sonrakı açıqlamalarında isə hər iki şəhərdə təhlükənin sovuşduğu qeyd olunub. Sakinlərdən rəsmi qurumların göstərişlərinə əməl etmələri, insanların sıx toplaşmasından və hadisə yerində çəkiliş aparmaqdan çəkinmələri istənilib.
Səudiyyə Ərəbistanının rəhbərlik etdiyi Ərəb Koalisiyasının sözçüsü, briqada generalı Türki əl-Maliki “X” hesabında husilərin Ər-Riyad istiqamətində iki ballistik raket atdığını bildirib. Onun sözlərinə görə, raketlər hava hücumundan müdafiə sistemləri tərəfindən qarşısı alınaraq məhv edilib.
Qeyd edək ki, Yəməndə vətəndaş müharibəsi 2014-cü ilin sentyabrında İranın dəstəklədiyi husilərin paytaxt Səna və bir sıra vilayətləri nəzarətə götürməsindən sonra başlayıb.
Səudiyyə Ərəbistanının rəhbərlik etdiyi Ərəb Koalisiyası 2015-ci ilin martından etibarən beynəlxalq ictimaiyyət tərəfindən tanınan Yəmən hökumətini dəstəkləyir.
Son dövrlərdə Yəmən hökumət qüvvələri ilə husilər arasında toqquşmaların intensivliyi artıb. İranın dəstəklədiyi husilər onlara qarşı hücumların həyata keçirildiyini əsas gətirərək Səudiyyə Ərəbistanını ballistik raketlər və pilotsuz uçuş aparatları ilə hədəfə alırlar.
10:02 08.11.2026
Oxunuş sayı: 56
