Türkiyədəki son hadisələr Azərbaycan vətəndaşlarının silah əldə etməsini məhdudlaşdıracaqmı?
Türkiyədə son günlər məktəblərdə baş verən silahlı insidentlər fonunda silah dövriyyəsinə nəzarətin daha da sərtləşdirilməsi məsələsi gündəmə gəlib.
Rəsmi Ankara vətəndaşların odlu silah əldə etməsinə məhdudiyyətlərin artırılması və qanun pozuntularına görə cəzaların ağırlaşdırılması istiqamətində əlavə hüquqi addımlar atmağa hazırlaşır.
Bu kontekstdə region ölkələrində, o cümlədən Azərbaycanda silah dövriyyəsinin necə tənzimləndiyi, vətəndaşların hansı şərtlərlə silah sahibi ola bildiyi və silahdan istifadənin hüquqi çərçivəsinin necə müəyyənləşdirildiyi məsələləri də aktuallıq qazanır.
Mövzu ilə bağlı hüqüqşünas Əkrəm Həsənov Crossmedia.az-a açıqlama verib:
"Ümumiyyətlə, bizdə bu məsələlər kifayət qədər sərtdir. Yəni hər kəsin silah əldə etməsi mümkün deyil. Silah əldə etmək üçün mütləq qaydada Daxili İşlər Nazirliyində qeydiyyatdan keçmək lazımdır. Bu proses tam nəzarət altındadır və ciddi prosedurlar əsasında həyata keçirilir.
Təbii ki, bəzi hallarda qanunsuz silah əldə edənlər də olur, lakin ümumi yanaşma baxımından ölkədə silah dövriyyəsi çox ciddi şəkildə tənzimlənir. Hətta demək olar ki, bu qaydalar bəzi ölkələrlə, o cümlədən Türkiyə ilə müqayisədə daha sərtdir.
Qeydiyyatsız şəkildə silah saxlamaq qətiyyən yolverilməzdir. Ümumiyyətlə, icazə verilən silahlar da əsasən ov silahları ilə məhdudlaşır və onların belə əldə olunması və istifadəsi üçün müəyyən qaydalar mövcuddur.
Eyni zamanda silahın saxlanması ilə bağlı da ciddi tələblər var. Silah evdə elə bir şəraitdə saxlanmalıdır ki, kənar şəxslərin, xüsusilə də yetkinlik yaşına çatmayanların əlinə keçməsi mümkün olmasın. Bu qaydalar həm təhlükəsizliyin təmin olunması, həm də mümkün risklərin qarşısının alınması baxımından olduqca vacibdir".
Ayhan
10:30 22.04.2026
Oxunuş sayı: 205
