Müsabiqə qalibi: "Yüksəliş bir növ cəsarət yarışıdır" - MÜSAHİBƏ
Son illərdə ölkəmizdə həyata keçirilən “Yüksəliş” müsabiqəsi qısa müddət ərzində cəmiyyətin böyük marağına səbəb olan, peşəkarlıq və şəffaflıq prinsiplərinə əsaslanan nüfuzlu bir platformaya çevrilib.
Layihənin əsas missiyası yüksək intellektual potensiala malik, idarəetmə bacarıqları ilə seçilən gəncləri üzə çıxarmaq, onların bilik və təcrübəsini daha geniş miqyasda tətbiq etmək üçün yeni imkanlar yaratmaqdır.
Bu təşəbbüs dövlətimizin insan kapitalının inkişafına, xüsusən də istedadlı və məqsədyönlü gənclərə göstərdiyi diqqətin bariz təzahürüdür.
Müsabiqənin əvvəlki illərdəki finalçılarının bu gün ölkənin müxtəlif sahələrində mühüm qərarların icrasında yaxından iştirak etməsi “Yüksəliş”in praktiki nəticələrinin və təsir gücünün ən parlaq göstəricisidir.
Layihə həm idarəetmədə innovativ yanaşmanı təşviq edir, həm də keyfiyyətli kadr ehtiyatının formalaşmasına sistemli şəkildə töhfə verir.
Hər il üzə çıxarılan onlarca istedadlı gəncin inkişaf üçün yeni perspektivlər qazanması proqramın strateji əhəmiyyətini bir daha ön plana çıxarır.
Bu dəfəki müsahibimiz III “Yüksəliş”müsabiqəsinin qaliblərindən biri olan Ülviyyə Mehralıyevadır. Həmin müsahibəni təqdim edirik:
- Sizin uğur yolunuzda “Yüksəliş” müsabiqəsinin rolu nə oldu? Bu proses şəxsiyyətinizdə hansı dönüş nöqtələrini yaratdı?
- Açıq desəm, “Yüksəliş” mənim həyatımda bir layihədən daha artıq məna daşıdı – bu, mənim üçün daxili oyanış nöqtəsi oldu. Çünki mən bu müsabiqəyə həyatımın elə bir mərhələsində qoşuldum ki, prioritetlərim tamamilə fərqli istiqamətdə idi.
Hətta əvvəlki müsabiqələrdən xəbərim olsa da, iştirak etmək nə planlarımda var idi, nə də özümə qarşı o cəsarəti hiss edirdim.
Amma üçüncü müsabiqə zamanı ətrafımın, dostlarımın, həmkarlarımın – inamı mənə də keçdi. Sadəcə bir anlıq qərarla qeydiyyatdan keçdim və nəticədə qalib oldum. Bu qalibiyyət mənim üçün yalnız nəticə deyildi, həm də özümə inamın bərpası idi.
Ən böyük dönüş nöqtəsi isə düşüncə tərzimdə baş verdi. Artıq daha rahat zonada qalmaq istəmədim, özümü daha çətin mühitlərə atmağa başladım. Bu dəyişiklik həm karyeramda, həm də şəxsi inkişafımda ciddi sıçrayış yaratdı.
- Müsabiqədə qarşılaşdığınız ən çətin mərhələ hansı idi və onu necə aşdınız?
- Ən çətin mərhələ üçüncü mərhələ – idarəetmə və analitik düşüncə bacarıqlarının yoxlanıldığı hissə idi. Bu mərhələ fiziki yox, daha çox zehni dözümlülük tələb edirdi. Saatlarla fasiləsiz analiz, diqqət və qərarvermə prosesi insanı həqiqətən sınağa çəkir.
Yarımfinal və final mərhələləri isə tamam başqa bir reallıq idi. Orada sən anlayırsan ki, tək deyilsən – sənin qədər, bəzən səndən də güclü namizədlər var. Mənim strategiyam isə klassik mənada “strategiya” deyildi. Mən sadəcə özüm oldum.
Öz fikrimi çəkinmədən ifadə etdim, komanda daxilində aktiv iştirak etdim və ən əsası – insanları dinləməyi unutmadım. Məncə, bu balans uğurun əsas açarıdır.
- Qələbənizi həm fərdi nailiyyət, həm də ictimai məsuliyyət kimi necə qiymətləndirirsiniz?
- Bu qalibiyyət, əlbəttə ki, mənim şəxsi uğurumdur. Amma eyni zamanda, ailəmin də uğurudur. Çünki bu yolun hər mərhələsində onların zəhməti və dəstəyi var.
Digər tərəfdən, “Yüksəliş” artıq cəmiyyət üçün müəyyən bir keyfiyyət göstəricisinə çevrilib. Bu ada sahib olmaq sadəcə status deyil, həm də məsuliyyətdir. Çünki sən artıq təkcə özünü yox, həmin platformanı da təmsil edirsən.
Mən düşünürəm ki, bu müsabiqə ölkədə potensiallı insanların üzə çıxarılması və doğru istiqamətdə yönləndirilməsi baxımından çox mühüm rol oynayır.
- Liderlik anlayışını sizin üçün fərqləndirən əsas xüsusiyyətlər hansılardır?
- Mənim üçün liderliyin əsası empatiyadır. İnsanları anlamaq, onların motivasiya mənbələrini görmək və buna uyğun yanaşmaq – bunlar liderin əsas vəzifələrindəndir.
Bundan əlavə, qətiyyətlilik, stres altında soyuqqanlılıq və özünü tanımaq çox vacibdir. Lider ilk növbədə özünü bilməlidir – hansı vəziyyətdə necə reaksiya verəcəyini əvvəlcədən dərk etməlidir.
Praktikada isə mən çalışıram ki, komandamda açıq ünsiyyət mühiti yaradım. İnsanlar fikirlərini rahat ifadə edə bilmirsə, orada inkişafdan danışmaq çətindir.
- Gələcək iştirakçılara hansı bacarıqları inkişaf etdirməyi tövsiyə edərdiniz?
- İlk mərhələlər üçün baza bilikləri – ümumi dünyagörüşü və analitik düşüncə vacibdir. Amma əsas fərqi yaradan mərhələlərdə emosional intellekt, qərarvermə və ünsiyyət bacarıqları ön plana çıxır.
Xüsusilə, yarımfinal və finalda qeyd edim ki, danışmaqdan çəkinməmək, komanda ilə işləmək, konstruktiv olmaq və ən əsası cəsarətli olmaq çox önəmlidir. Bir sözlə “Yüksəliş” bir növ cəsarət yarışıdır.
- Müasir dövrdə uğurlu lider olmaq üçün hansı keyfiyyətlər vacibdir?
- Müasir lider artıq əmr verən deyil, anlayan və yönləndirən şəxsdir. Emosional intellekt burada əsas rol oynayır.
Azərbaycan reallığında isə bir məsələni xüsusi qeyd edərdim: “günahkar axtarma mədəniyyəti”. Mən buna qarşıyam. Problemi müzakirə etmək olar, amma əvvəlcə onu həll etmək lazımdır.
Sağlam mübahisə olmalıdır, amma dağıdıcı münaqişə yox. Etimad mühiti yaradan lider həmişə daha güclü komanda qurur.
- Gələcək planlarınız və bu uğuru ictimai faydaya çevirmək istiqamətində addımlarınız nələrdir?
- Hazırda əsas məqsədim həm öz sahəmdə inkişaf etmək, həm də biliklərimi paylaşmaqdır. Gənclərlə işləmək mənə xüsusi motivasiya verir.
Universitetdə dərs demək, mentorluq görüşləri keçirmək, təlimlər təşkil etmək – bunlar artıq fəaliyyətimin ayrılmaz hissəsinə çevrilib.
Gələcəkdə beynəlxalq səviyyədə təlimçi kimi fəaliyyət göstərmək və layihə idarəçiliyi sahəsində daha da ixtisaslaşmaq istəyirəm.
- Sonda gələcək iştirakçılara bir cümlə ilə nə demək istərdiniz?
- İlk addımı atın – qeydiyyatdan keçin; çünki bu müsabiqə sizdən heç nə almır, əksinə sizə çox şey qazandırır.
12:27 16.04.2026
Oxunuş sayı: 755
