İsrail Hərbi Hava Qüvvələri Tehranın mərkəzində yerləşən və İranın mərhum Ali Dini Lideri Əli Xameneiyə məxsus kompleksə hava zərbəsi endirib.
Crossmedia.az xəbər verir ki, bu barədə İsrail Müdafiə Qüvvələrinin Mətbuat Xidməti məlumat yayıb.
Məlumata görə, hücum zamanı ayətullah rejiminin əsas qərargahı hesab edilən obyekt, o cümlədən Prezident Administrasiyası və Ali Milli Təhlükəsizlik Şurasının binası hədəfə alınıb.
Açıqlamada bildirilir ki, təhlükəsizlik qərarlarının qəbul edildiyi yüksək səviyyəli iclas kompleksi, zabit hazırlığı ilə bağlı institut və digər vacib infrastruktur obyektləri də zərbələrə məruz qalıb.
Sözügedən iqamətgah İranın ən ciddi şəkildə qorunan obyektlərindən biri hesab olunur və Tehranın mərkəzində bir neçə küçəni əhatə edir. Burada İran hakimiyyəti və təhlükəsizlik strukturları mütəmadi iclaslar keçirir, o cümlədən ölkənin nüvə proqramı ilə bağlı məsələləri müzakirə edirdi.
