Xarici xəbərlər

İrana qarşı həyata keçirilən genişmiqyaslı hücumun təfərrüatları açıqlanıb

İrana qarşı həyata keçirilən genişmiqyaslı hücumun təfərrüatları açıqlanıb.

Crossmedia.az xəbər verir ki, bu barədə "The Wall Street Journal" məlumat yayıb.

Məlumata görə, ABŞ və İsrail İranın Ali Lideri Seyid Əli Xameneinin iqamətgahına zərbələr endirib. Bildirilir ki, ölkənin ali rəhbərliyinin binada olduğu iddia edilən vaxtda obyektə 30 bomba atılıb və iqamətgah tamamilə dağıdılıb.

Nəşr yazır ki, İsrail əməliyyata təxminən 200 qırıcı təyyarə cəlb edib və ölkə daxilində 500-ə yaxın hədəfi vurub.

Bu, İsrail tarixində ən böyük tək hava kampaniyası kimi qiymətləndirilir.

Qeyd olunur ki, ABŞ prezidenti Donald Tramp danışıqların uğursuzluğa düçar olması ilə bağlı məlumatdan sonra əməliyyata başlamaq qərarı verib.

İddiaya əsasən, Tehran uranın zənginləşdirilməsini dayandırmaqdan və raket proqramını məhdudlaşdırmaqdan imtina edib. ABŞ kəşfiyyatı isə İranın Amerika hədəflərinə mümkün hücumlar hazırladığını irəli sürüb.

Bununla yanaşı, ölkəyə qarşı genişmiqyaslı kiberhücumun da həyata keçirildiyi bildirilir. Məlumata görə, hökumət sistemləri və İRAN Xəbər Agentliyi (IRNA) haker hücumuna məruz qalıb. Eyni zamanda, iddialara görə, İslam İnqilabı Keşikçiləri Korpusunun (İİKK) əsgərlərini fərariliyə çağıran mesajlar məşhur dua tətbiqi vasitəsilə yayılıb.

🖨 Çap et

12:48 01.03.2026

Oxunuş sayı: 494