Bullinq uşaqlarda hansı problemləri yaradır? - AÇIQLAMA
Uşaqlar arasında baş verən bullinq və ya zorakılığa məruz qalma halları hələ də aktual olan problemlərdən biri olaraq qalmaqda davam edir. Azyaşlılar arasında bullinq bir-birinə fiziki və ya mənəvi şəkildə təzyiqlər etməsi ilə özünü göstərir. Uşaqların öz həmyaşıdlarına qarşı bu cür davranışları qarşı tərəfdə özünümüdafiədə çətinlik yaranmasına‚ özgüvən əskikliyinə və təkliyə meyillilik yaradır.
Mövzu ilə bağlı Ailə və Uşaq psixoloqu Aynur İsmayılova Crossmedia.az-a danışıb. Psixoloq bullinq‚ onun səbəbləri və uşaqlarda törətdiyi özgüvənsizlik haqqında qısa məlumat verib:
“Bullinq 90-cı illərdə də mövcud idi. Ancaq bu qədər inkişaf etməmişdi. Son zamanlar istər Avropa‚ istərsə də Azərbaycan məktəblərində geniş yayılıb. Bullinq bir uşağa qarşı törədilən zorakılıqdır‚ sosial cəmiyyətdə gözdən salınmasıdır. Həmin uşağın hər hansı bir qabiliyyəti ola bilər‚ yaxud da qarşı tərəfə qarşı cüzi bir səhv etmişdə ola bilər. Hardasa hər bir uşağın daxilində az da olsa özgüvənsizlik hissi var. Ancaq bullinqə məruz qalmış uşağın özgüvənsizliyi daha çox olur.”
Aynur İsmayılova bullinqlə mübarizə yolları haqqında da fikir bildirib:
“Bununla mübarizə aparmaq üçün mütləq şəkildə uşaq psixoloqun‚ psixoterapevtin qəbulunda olmalıdır. Psixoloji terapiya almalıdır ki‚ bullinqlə mübarizə aparmaq üçün onun özgüvəni qalxsın. Valideynlər və müəllimlər bu barədə çox diqqətli olmalıdır. Əgər bir müəllim hansısa uşağa qarşı bu halların baş verdiyini müşahidə edirsə‚ mütləq şəkildə bu barədə valideynlərə xəbər verilməlidir. Bəzi hallarda xaraktercə zəif‚ özgüvəni aşağı olan uşaqlar yeniyetməlik çağında bullinqə məruz qaldıqda özünəqəsd etməyə cəhd edir. Bunun qarşını almaq üçün valideyn‚ müəllim və psixoloq üçbucağını sağlam yaratmaq lazımdır. Uşaq isə mütləq psixoloqun qəbulunda olaraq bullinqlə mübarizə qaydalarını sağlam şəkildə öyrənməlidir. Bullinqlə sağlam mübarizə aparmaq üçün mütləq psixoloqun‚ psixoterapevtin köməyi lazımdır.”
Psixoloq əlavə olaraq psixoterapiyanın gələcəkdə uşağın həyatına edəcəyi müsbət təsirləri də diqqətə çatdırıb:
“İşdə‚ yetkinlik yaşlarında belə bullinq halları baş verə bilir. Əgər uşaq vaxtında psixoloji seanslardan keçib‚ psixokorreksiya olunubsa gələcəkdə bullinq yaşasa da‚ sağlam mübarizəni necə aparmaq lazım olduğunu əvvəlcədən bilmiş olurlar.”
Tərlan Əmrahova
10:14 04.12.2024
Oxunuş sayı: 8329
