İtaliyada yaşayan soydaşımız Gənc Avropa səfiri seçilib
İtaliyanın Genuya şəhərində yaşayan doktorant, beynəlxalq təhlükəsizlik və siyasi araşdırmalar üzrə tədqiqatçı, diaspor fəalı Toğrul Əliyev 2026–2027-ci illər üzrə Gənc Avropa səfiri (YEAs) seçilib.
Crossmedia.az xəbər verir ki, “Gənc Avropa səfirləri” (YEAs) təşəbbüsü 2016-cı ildə Avropa İttifaqının (Aİ) “Şərq Qonşuluğu üzrə Regional Kommunikasiya Proqramı” (“EU NEIGHBOURS east”) çərçivəsində həyata keçirilməyə başlanıb. Bu təşəbbüs Azərbaycan, Belarus, Gürcüstan, Moldova, Ukrayna, Ermənistan, eləcə də Aİ-yə üzv dövlətlər və Birləşmiş Krallıqdan olan gəncləri bir araya gətirən, onları əlaqələndirən, qeyri-siyasi, könüllülük prinsiplərinə əsaslanan və dinamik şəkildə fəaliyyət göstərən bir kommunikasiya şəbəkəsidir. Şəbəkə Aİ-nin Şərq Tərəfdaşlığı ölkələri ilə əməkdaşlığı barədə məlumatlılığın artırılmasını, müxtəlif mövzularda siyasi dialoqa dəstək verilməsini və daha yaxşı gələcək naminə birgə fəaliyyətin təşviq edilməsini hədəfləyir.
Qeyd edək ki, Toğrul Əliyev Türkiyə və İtaliyada təhsil alıb. “Erasmus+” proqramı çərçivəsində bir neçə Avropa ölkəsində təcrübə keçib. Diaspor layihələrində fəal iştirak edən soydaşımız Xankəndidə keçirilən Diaspor Gənclərinin VI Yay Düşərgəsinin iştirakçısı, Azərbaycan Diaspor Gəncləri (ADG) təşkilatının üzvüdür.
20:05 03.12.2025
Oxunuş sayı: 744
