İran Rusiyaya milyardlarla dollarlıq raket və silah satıb
Rusiya Ukraynaya qarşı genişmiqyaslı müharibədən öncə İrandan iri həcmli raket və hərbi texnika tədarükünə dair gizli müqavilələr imzalayıb. Qərb mənbələrinin məlumatına görə, bu razılaşmalar Moskvanın Tehrana hərbi asılılığının müharibədən xeyli əvvəl formalaşdığını göstərir.
Crossmedia.az xəbər verir ki, bu barədə təhlükəsizlik məsələləri üzrə anonim Qərb rəsmisi Bloomberg agentliyinə açıqlamasında bildirib.
Onun sözlərinə görə, Rusiya ilə İran arasında raket silahlarının tədarükünə dair müqavilələr 2021-ci ilin oktyabr ayından etibarən – Ukraynaya hücumdan bir neçə ay əvvəl imzalanıb.
Müqavilələr çərçivəsində Rusiyaya ballistik raketlər və “yer-hava” tipli raketlər satılıb. Xüsusilə, tədarüklərə aşağıdakılar daxil olub:
- qısa mənzilli Fath-360 tipli yüzlərlə ballistik raket;
- təxminən 500 ədəd digər qısa mənzilli ballistik raket;
- hava hücumundan müdafiə sistemləri ilə əlaqəli 200-ə yaxın “yer-hava” raketi.
Bundan əlavə, İran Rusiyaya milyonlarla döyüş sursatı və artilleriya mərmisi ötürüb, eləcə də Şahid-136 kamikadze pilotsuz uçuş aparatlarını və onların Rusiya ərazisində “Geran-2” adı altında istehsalı üçün texnologiyanı təqdim edib. 2023-cü ilin əvvəlində imzalanan dron müqaviləsinin dəyəri 1,75 milyard dollar həcmində qiymətləndirilir.
Qərb mənbələrinin hesablamalarına əsasən, 2021-ci ilin sonundan bu günə qədər Rusiya İrandan aldığı hərbi texnikaya 4 milyard dollardan çox vəsait xərcləyib.
Nihat Tahirov
10:20 13.01.2026
Oxunuş sayı: 1742
