MAQATE: Rusiyanın hücumu Ukraynadakı nüvə təhlükəsizliyi üçün kritik əhəmiyyətli yarımstansiyalara zərər vurub
Rusiyanın 30 oktyabr tarixində Rusiyanın Ukraynanın enerji infrastrukturlarına endirdiyi hücumlar ölkədə nüvə təhlükəsizliyi və müdafiəsi üçün həyati əhəmiyyət daşıyan yarımstansiyaların zədələnməsinə səbəb olub.
Crossmedia.az-ın verdiyi xəbərə görə bu barədə Beynəlxalq Atom Enerjisi Agentliyi (MAQATE) məlumat yayıb.
Agentliyin hesabatında bildirilir ki, hücum nəticəsində Ukraynadakı bir sıra yarımstansiyalar zərər görüb və bu, nüvə təhlükəsizliyi baxımından ciddi risk yaradıb. Hadisədən sonra MAQATE-nin Cənub-Ukrayna və Xmelnitski Atom Elektrik Stansiyalarındakı komandaları hər iki stansiyanın xarici elektrik xətlərindən birinə çıxışı itirdiyini bildiriblər.
Bundan əlavə, MAQATE-nin Rivne Atom Elektrik Stansiyasındakı komandası da məlumat verib ki, stansiya enerji şəbəkəsi operatorunun tələbi ilə dörd blokdan ikisinin gücünü azaldıb.
MAQATE-nin baş direktoru Rafael Qrossi vəziyyətlə bağlı açıqlamasında nüvə təhlükəsinin real olduğunu vurğulayıb.
“Bir daha nüvə obyektlərinin yerləşdiyi ərazilərdə maksimum hərbi təmkin nümayiş etdirməyə və nüvə təhlükəsizliyinin yeddi əsas prinsipinə tam əməl etməyə çağırıram,” – deyə Qrossi qeyd edib.
15:52 31.10.2025
Oxunuş sayı: 1609
