Yasamal rayonunda “44 günlük zəfər tariximiz” mövzusunda esse yazı müsabiqəsi keçirilib
YAP Yasamal rayon təşkilatı, Yasamal Rayon İcra Hakimiyyəti və Bakı Şəhər Gənclər və İdman İdarəsinin Yasamal rayonu üzrə Gənclər və İdman sektorunun birgə təşkilatçılığı ilə “Konstitusiya və Suverenlik İli” çərçivəsində Vətən müharibəsində qazanılmış Zəfərin 5-ci ildönümünə həsr olunmuş Yasamal rayonunda fəaliyyət göstərən ümumi təhsil müəssisələrində təhsil alan VIII və IX sinif şagirdləri arasında “44 günlük zəfər tariximiz” adlı esse yazı müsabiqəsi keçirilib.
Crossmedia.az xəbər verir ki, müsabiqədə YAP Yasamal rayon təşkilatının sədri Bəxtiyar Nəbiyev, Yasamal Rayon İcra Hakimiyyəti başçısının müavini Təravət Muradova, Bakı Şəhər Gənclər və İdman İdarəsinin Yasamal rayonu üzrə Gənclər və İdman sektorunun müdiri İlham Səfərov, Yasamal rayonunda fəaliyyət göstərən ümumi təhsil müəssisələrinin müəllim kollektivi və müsabiqə iştirakçıları olan şagirdlər iştirak edib.
Ümumi təhsil müəssisələrində çıxış edən YAP Yasamal rayon təşkilatının sədri Bəxtiyar Nəbiyev, Yasamal Rayon İcra Hakimiyyəti başçısının müavini Təravət Muradova, Bakı Şəhər Gənclər və İdman İdarəsinin Yasamal rayonu üzrə Gənclər və İdman sektorunun müdiri İlham Səfərov çıxışlarında ilk öncə “Konstitusiya və Suverenlik ili” və Vətən müharibəsində qazanılmış Zəfərin 5-ci ildönümü haqqında, onların əhəmiyyətindən bəhs ediblər. Qeyd olunub ki, 44 günlük Vətən müharibəsində qazanılmış tarixi Zəfər Azərbaycanın dövlətçilik ənənələrinin gücünü bir daha göstərdi. Bu Zəfər, xalqın birliyi və iradəsi nəticəsində əldə olunmuş böyük nailiyyətdir. Gənclərə, şagirdlərə bu Zəfərin əhəmiyyəti düzgün dəyərlər və vətənpərvərlik ruhu ilə aşılanır. Dövlətçilik və suverenlik anlayışlarının gənclərdə, şagirdlərdə möhkəmləndirilməsi gələcək uğurların təməlini qoyur. Bu yol, vətənə bağlı, məsuliyyətli və hərtərəfli inkişaf etmiş gənc nəsillərin yetişməsinə xidmət edir. 44 günlük Vətən müharibəsində əldə edilən Zəfər yalnız torpaqlarımızın azadlığı deyil, həm də şəhidlərimizin ruhuna böyük ehtiram və xalqımızın milli qürurunun bərpasına bəslənən dərin hörmətdir. Bununla bağlı olaraq bu cür müsabiqələr gənc nəslin tarixi yaddaşını möhkəmləndirir və onlarda dövlətçiliyə və milli dəyərlərə hörməti artırır. Eyni zamanda belə müsabiqələr gənclərin, şagirdlərin vətənpərvər, məsuliyyətli vətəndaş kimi formalaşmasında mühüm rol oynayır.
Qeyd edək ki, müsabiqənin yekununda qaliblər münsiflər heyətinin qərarı ilə müəyyən olunacaq və onlara I, II və III yerlər üzrə mükafatlar təqdim ediləcəkdir.
16:38 10.10.2025
Oxunuş sayı: 1585
