“Balaca qəlblərlə böyük görüş” layihəsi Şəkidə gerçəkləşib
Yeni Klinikanın rəhbərliyi və tibbi heyəti Azərbaycan Həmkarlar İttifaqları Konfederasiyası və Səhiyyə İşçiləri Həmkarlar İttifaqı Respublika Komitəsinin dəstəyi ilə Şəki şəhər 6 saylı Uşaq evi sosial xidmət müəssisəsinin sakinlərini ziyarət edib.
Crossmedia.az xəbər verir ki, bu barədə Yeni Klinikanın mətbuat xidmətindən məlumat verilib.
Bildirilib ki, səfər çərçivəsində Şəki Şəhər İcra Hakimiyyətinin başçısı Elxan Usubovla görüş olub. Görüş zamanı Elxan Usubov qayğıya ehtiyacı olan uşaqlara göstərilən diqqət, eləcə də bu cür sosial təşəbbüslərə verdiyi dəstəyə görə Yeni Klinikaya təşəkkür edib.
Barat Yusubov klinikanın fəaliyyəti haqqında məlumat verərək Şəki Şəhər İcra Hakimiyyəti ilə gələcəkdə də sosial və humanitar istiqamətli layihələrin həyata keçirilməsində əməkdaşlığa hazır olduğunu bildirib.
“Balaca qəlblərlə böyük görüş” adlı sosial layihə çərçivəsində təşkil olunan səfərin məqsədi uşaqlara mənəvi dəstək göstərmək, onların sağlamlıq vəziyyətinə diqqət yetirmək və cəmiyyətin diqqətini qayğıya ehtiyacı olan uşaqların problemlərinə yönəltmək olub. Ziyarət zamanı uşaq evinin sakinləri Yeni Klinikanın həkim-pediatrları tərəfindən müayinə olunub, onlarla səmimi söhbətlər aparılıb, müxtəlif hədiyyələr təqdim edilib.
Klinikanın direktoru uşaq evinin direktor müavini İlhamə Məmmədova ilə görüşərək müəssisədə yaradılmış şəraitlə tanış olub, burada yaşayan uşaqların sağlamlıq vəziyyəti ilə bağlı fikir mübadiləsi aparıb. Direktor bu cür sosial təşəbbüslərin Yeni Klinikanın korporativ sosial məsuliyyət strategiyasının əsas istiqamətlərindən biri olduğunu xüsusi qeyd edib.
Ziyarət zamanı iştirakçılar, həmçinin qədim Şəkinin zəngin tarixi irsi, memarlıq ənənələri və turizm potensialı ilə yaxından tanış olublar.
17:04 07.10.2025
Oxunuş sayı: 6151
