Sosium

Qayıdan torpaqlar,qayıtmayan oğullar

27 sentyabr tarixi xalqımızın yaddaşından, o cümlədən də hərb tariximizdən heç bir zaman silinməyəcək. Çünki, məhz həmin gün 32 ildən bəri davam edən Ermənistan-Azərbaycan münaqişəsinin həllində yeni mərhələnin başlanğıcı oldu. İşğalçılıq və təcavüzkarlıq siyasətini davam etdirən, terrorçuluğu dövlət siyasətinə çevirən Ermənistanın quldur silahlı birləşmələri növbəti dəfə atəşkəs rejimini pozdu, qanlı əməllərini, sülhə, təhlükəsizliyə təhdid olan niyyətlərini yenidən gerçəkləşdirməyə cəhd etdi, lakin Müzəffər Ali baş komandan, Azərbaycan əsgəri və Azərbaycan xalqı bir daha sübut etdi ki, şəhidlərimizin qanı nahaq yerə tökülmədi. Nəticə etibarilə 44 günlük müharibədə ordumuzun qəhrəmanlığı, Ali Baş komandanın qətiyyəti ermənilərin və havadarlarının bölgədəki siyasətinin iflası ilə nəticələndi. Bütün təhdidlərə və təzyiqlərə baxmayaraq Azərbaycan qələbə qazandı və tarixi ədalət bərpa olundu.

Prezident İlham Əliyev İkinci Qarabağ müharibəsi bitdikdən sonra Vətən müharibəsinin başladığı günü Anım Günü kimi qeyd etmək barədə 2020-ci il dekabrın 2-də Azərbaycan Respublikasında Anım Gününün təsis edilməsi haqqında Sərəncam imzaladı.

Milli təqvimimizdə əbədi anlam qazanan 27 sentyabr 2020-ci il Vətən torpaqlarının azad edilməsi uğrunda həlak olmuş cəmi şəhidlərimizin Anım Günü kimi qeyd olunur.

Şanlı tariximizə yazılan Vətən müharibəsi Azərbaycan xalqının mübarizliyini və yenilməzliyini bir daha dünyaya nümayiş etdirdi. Neçə-neçə igid oğullar torpaqlarımızın azadlığı uğrunda canlarından keçərək şəhidlik zirvəsinə yüksəldilər. Torpaq, vətən uğrunda gedən döyüşlərdə şəhidlik zirvəsinə ucalanları bu gün xatırlamaq mənəvi borcumuzdur.

Hər bir şəhid ömrü bir tarixdir. Vətən müharibəsində Silahlı Qüvvələrimizin 2783 nəfər hərbi qulluqçusu həlak olmuş, yüz nəfərdən artıq hərbi qulluqçumuz itkin düşmüş, min nəfərdən artıq hərbi qulluqçumuz yaralanaraq sağlamlığını itirmişdir. İşğal altında olan torpaqlarımız qəhrəman şəhidlərimizin, əsgər və zabitlərimizin, qazilərimizin qanı və canı bahasına azad olunmuşdur.

Şəhid olmağı özünə şərəf bilən hər kəsin daxilində yüksək vətənpərvərlik, cəsurluq vardır. Elə buna görə də onlar şüurlu şəkildə ölümü gözə ala bilib, şəhid olurlar.

Belə şəhidlərdən biri də əsgər Abbasov Ruslan Hikmət oğlu idi. Onun çoxlu arzuları var idi. Qisməti şəhidlik oldu..

O, 2000-ci ildə Bakı şəhərinin Sahil qəsəbəsində dünyaya gəlmişdi. Ruslan orta təhsilini Qaradağ rayonunun Sahil qəsəbəsindəki Əliheydər Kazımov adına 228 saylı tam orta məktəbdə alandan sonra ailəsinə maddi kömək göstərmək məqsədi ilə müxtəlif işlərdə çalışmışdı. 2019-cu ilin aprel ayında müddətli həqiqi hərbi xidmətə çağırılmışdı. Ağcabədi rayonunda “N” saylı hərbi hissədə 3 ay xidmət edəndən sonra Beyləqan ərazisindəki hərbi hissəyə göndərilmişdi. 27 sentyabr 2020-ci ildə quldur erməni silahlı birləşmələrinin növbəti təxribatına cavab olaraq Azərbaycan Ordusu bütün cəbhə xətti boyunca əks-hücum əməliyyatına başlayanda Ruslanın xidmət etdiyi tabor düşmənin strateji postlarını bir-birinin ardınca ələ keçirməyə nail olmuşdur. Döyüş meydanında şücaət göstərən Ruslan Abbasov 14 oktyabr 2020-ci ildə Füzuli şəhərinin azadlığı uğrunda gedən döyüşlərdə şəhid olmuşdur. 16 oktyabrda Qaradağ rayonunun Lökbatan qəsəbəsindəki Şəhidlər xiyabanında dəfn olunmuşdur.

Ölümündən sonra əsgər Ruslan Abbasov “Vətən uğrunda” və “Füzulinin azad olunmasına görə” medalları ilə təltif edilmişdir. Belə şəhidlərdən biri də baş gizir Abbasov İntiqam Yavər oğlu idi. O, 1978-ci il sentyabrın 21-də Masallı rayonunun Köçəkli kəndində anadan olmuşdur. 1985-1996-cı illərdə Sərhəddin Rəhimov adına Köçəkli kənd tam orta məktəbində təhsil almış, 1996-cı ildə həqiqi hərbi xidmətə çağırılmışdır. Hərbi xidmətdən sonra birillik gizir hazırlığı kursu keçərək müddətdən artıq hərbi qulluqçu kimi xidmətini davam etdirmişdir. 6 il Naxçıvan Muxtar Respublikasında “N” saylı hərbi hissədə gizir rütbəsində tank komandiri kimi vəzifə borcunu yerinə yetirmişdir. 2006-cı ildən İntiqam xidmətini Pereküşkül hərbi şəhərciyində davam etdirmişdir. O, 2016-cı ildə Aprel döyüşlərində şücaət göstərmişdi. Azərbaycan Silahlı Qüvvələrinin baş giziri kimi yaxasını “Qüsursuz xidmətə görə” III, II və I dərəcəli medallar bəzəyirdi... İntiqam 2020-ci il sentyabrın 27-də işğal altında olan ərazilərin azad edilməsi və Azərbaycanın ərazi bütövlüyünün bərpa olunması uğrunda başlanan Vətən müharibəsi zamanı Füzuli və Cəbrayılın 7 kəndinin azad edilməsində şücaət göstərmişdir. Sentyabrın 29-da cəsur gizir Füzulidə strateji yüksəkliklərdən birinin geri alınması zamanı aldığı qəlpə yarasından şəhid olmuşdur. Masallı rayonunun Köçəkli kəndində dəfn olunmuşdur. Azərbaycan Prezidenti İlham Əliyevin müvafiq sərəncamları ilə İntiqam Abbasov ölümündən sonra “Vətən uğrunda”, “Füzulinin azad olunmasına görə” və “Hərbi xidmətlərə görə” medalları ilə təltif edilmişdir.

2020-ci ilin noyabr ayının 9-dan 10-na keçən gecə Azərbaycan Respublikası Silahlı Qüvvələrinin Ali Baş Komandanı, Prezident İlham Əliyev xalqımıza müraciət edərək 44 gün davam edən Vətən müharibəsində “Dəmir yumruq” əməliyyatının uğurla başa çatdığını və uzun illər həsrətində olduğumuz şanlı qələbəmizin müjdəsini verdi. Təəssüflər olsun ki, müharibələr itkisiz olmur, Vətən torpaqlarının azadlığı da, müdafiəsi də qurbanlar tələb edir. Müharibədə iştirak edənlər vətən, dövlət və xalq qarşısında öz borcunu sonadək ödəyib qəhrəmanlıq nümunəsi yaratdılar. Azərbaycanı sevən, dövlətimizin atributlarına hörmətlə yanaşan, vətəni düşmən təcavüzündən qoruyan cəsur və vətənpərvər oğullar millətimizin qürur mənbəyidir.

Dövlətimiz və xalqımız ana vətənimizin yolunda canını qurban verənləri həmişə qəlbində yaşadır, onları şərəf və qeyrət simvolu kimi dəyərləndirir və gənc nəslə nümunə kimi təqdim edir. Azərbaycan xalqı hər zaman torpaqlarımızın azadlığı uğrunda canını qurban vermiş şəhidlərimizin xatirəsini uca tutur və onlarla fəxr edir. Şəhidlərimiz bizim azadlıq, müstəqillik, yenilməzlik, qəhrəmanlıq simvolumuzdur. Tanrıdan bütün şəhidlərimizə rəhmət diləyir, məzarları nurla dolsun deyirik.