Qarabağın dörd tacı: Xankəndi, Xocalı, Xocavənd və Ağdərə azadlıq günündə
20 sentyabr 2023-cü il Azərbaycan tarixində dönüş nöqtəsi kimi qiymətləndirilir. Bu gün Qarabağın dörd tacı – Xankəndi, Xocalı, Xocavənd və Ağdərə Azərbaycanın tam suverenliyinin bərpası ilə əlaqədar olaraq azad edildi. Azərbaycan Respublikasının Prezidenti cənab İlham Əliyev çıxışında vurğulayıb: “Azərbaycan ordusunun hərbi əməliyyatları nəticəsində Qarabağın əsas şəhərlərində suverenliyimiz təmin edildi. Bu, xalqımızın uzun illər gözlədiyi ədalətin bərpasıdır”.
Uzun illər işğal altında olan bu torpaqlar milli yaddaşın həm ağrı, həm də qürur mərkəzi olub. Xankəndi Qarabağın inzibati və siyasi paytaxtı, Xocalı isə 1992-ci il soyqırımı ilə beynəlxalq hüquq və vicdan qarşısında Azərbaycanın haqq səsini simvollaşdırır. Xocavənd strateji əhəmiyyətə, Ağdərə isə hərbi-taktiki gücə malikdir. 20 sentyabrda bu dörd şəhərin azad olunması tarixi ədalətin bərpası kimi qiymətləndirilir.
Azərbaycan dövlətinin uzaqgörən və ardıcıl siyasəti nəticəsində Qarabağ məsələsi beynəlxalq hüquq çərçivəsində həll edildi. 2020-ci il Vətən müharibəsi və 2023-cü il antiterror əməliyyatları nəticəsində Azərbaycan Ordusu 406 kvadratkilometr ərazi üzərində tam nəzarəti bərpa etdi.
Əməliyyat cəmi 23 saat 50 dəqiqə davam edib və Ermənistan silahlı qüvvələrinin qalıqları silahlarını təhvil verdi. Azərbaycan Müdafiə Nazirliyinin məlumatına görə, bu əməliyyat beynəlxalq hüququn norma və prinsiplərinə uyğun həyata keçirilib. Əməliyyatın uğuru xalqın uzun illər ərzində göstərdiyi iradə və dözümlülüyünün nəticəsidir. 20 sentyabr dörd şəhərin adının birlikdə çəkilməsi ilə milli həmrəyliyin simvolu oldu. Azərbaycanın ictimai rəyinə görə, xalq öz tarixini qürurla yazır və şəhidlərin qanı ilə alınmış qələbəni qoruyur.
15 oktyabr 2023-cü ildə Azərbaycanın müasir tarixində yeni mərhələ kimi yadda qaldı. Azərbaycan prezidenti, Silahlı Qüvvələrin Ali Baş Komandanı İlham Əliyev Xankəndi, Xocalı, Xocavənd və Ağdərə şəhərlərində Dövlət Bayrağımızı ucaldaraq Azərbaycanın tam suverenliyinin və ərazi bütövlüyünün simvolik təsdiqini verdi. Dövlət Bayrağının ucaldılması yalnız rəmzi bir hərəkət deyil, bu, Azərbaycan dövlətçiliyinin gücünü, xalqın birliyini və uzun illər gözlənilən ədalətin bərpasını simvollaşdırır. Uzun illər işğal altında qalan Xankəndi, Xocalı, Xocavənd və Ağdərə indi Respublikamızın tam hüquqlu şəhərləri kimi qəbul edilir. Bu, həm də xalqın dözümlülüyü və iradəsinin nəticəsidir.
Bayrağın ucaldılması ilə simvolik suverenlik nümayiş olunarkən, bölgədə bərpa və infrastruktur işləri də sürətlə davam edir. Xankəndi və Xocavənd mədəni və strateji mərkəz, Ağdərə iqtisadi resurs və hərbi mövqe, Xocalı isə milli yaddaş mərkəzi kimi inkişaf etdirilir. Dövlət simvollarımızın azad edilmiş şəhərlərdə ucaldılması beynəlxalq aləmdə də diqqət mərkəzinə çevrildi. Bu, ölkəmizin ərazi bütövlüyü və suverenliyinin beynəlxalq hüquq çərçivəsində tanınmasının əyani göstəricisidir. 15 oktyabr 2023-cü il tarixi Dövlət Bayrağımızın ucaldıldığı gün yalnız tarixi qələbənin yox, həm də milli qürurun rəmzidir.
Ölkəmizin başçısı cənab İlham Əliyev Xankəndiyə səfər edərək bölgə sakinləri ilə görüşlər keçirib, onların təhlükəsizlik, sosial və infrastruktur məsələləri ilə maraqlanıb. Bu, xalqın dövlətə inamını gücləndirir və milli birliyin bariz göstəricisidir. Prezidentin səfərləri bölgədə bərpa və quruculuq işlərinin sürətləndirilməsi üçün mühüm impuls rolunu oynayır. Səfər çərçivəsində infrastruktur layihələrinin gedişi, yolların, məktəblərin və səhiyyə obyektlərinin bərpası ilə bağlı göstərişlər verilib. Ali Baş Komandan İlham Əliyevin Xankəndiyə səfərləri, yalnız tarixi və strateji qələbənin simvolu deyil, həm də milli qürurun və dövlətin gücünün nümayişidir.
20 sentyabr – Qarabağın dörd tacının Azərbaycanın başı üzərində parladığı gündür. Dövlətimizin gücü, xalqımızın iradəsi və şəhidlərimizin müqəddəs ruhu bu qələbəni simvolizə edir. Xankəndi, Xocalı, Xocavənd və Ağdərə yalnız azad şəhərlər deyil, həm də Azərbaycanın milli və tarixi qürur səhifəsi kimi gələcək nəsillərə miras qalacaq.
Nigar Abdullayeva
YAP Yasamal rayonu AMEA Folklor İnstitutu
üzrə ərazi partiya təşkilatının sədr müavini
13:50 18.09.2025
Oxunuş sayı: 10375
