Xankəndidən Xocalıya, Xocavənddən Ağdərəyə – Azərbaycanın əbədi suverenliyi
Azərbaycan tarixinin ən parlaq səhifələrindən biri məhz 2023-cü ilin sentyabrında yazıldı. 19–20 sentyabr antiterror tədbirləri nəticəsində Qarabağ ərazisində mövcud olan qeyri-qanuni erməni silahlı birləşmələri qısa zamanda zərərsizləşdirildi, separatçı rejim birdəfəlik ləğv edildi və Azərbaycanın tam suverenliyi bərpa olundu. Bunun ardınca dövlət başçısının Sərəncamı ilə 20 sentyabr “Xankəndi, Xocalı, Xocavənd və Ağdərə şəhərləri günü” kimi təsis olundu və artıq iki ildir ki, Azərbaycan xalqı bu tarixi qürurla qeyd edir.
“Xankəndi, Xocalı, Xocavənd və Ağdərə şəhərləri günü” həm qələbə, həm də ədalətin bərpası günüdür. Bu günün hər il dövlət səviyyəsində qeyd olunması, Azərbaycanın Qarabağda tam suverenliyinin təsdiqidir. İşğal illərinin faciəvi xatirələrinin tarixi ədalətlə əvəzlənməsi, həm də gələcək nəsillərə azadlığın qədrini öyrətmək baxımından mühüm əhəmiyyət daşıyır.
Bu gün artıq xalqımızın milli kimliyinin, qürurunun və döyüş ruhunun təcəssümünə çevrilib.
15 oktyabr 2023-cü il, Dövlət Bayrağının Xankəndidə, Xocalıda, Xocavənddə və Ağdərədə ucaldılması, cənab Prezident Müzəffər Ali Baş Komandan İlham Əliyev 15 oktyabr 2023-cü il tarixində Xankəndi, Xocalı, Xocavənd və Ağdərə şəhərlərinə səfər edərək Azərbaycan Bayrağını ucaltmağı tarixi hadisə idi. 30 ilə yaxın həsrət qaldığımız şəhərlərin rəsmi olaraq dövlət rəmzlərimizlə bəzənməsi, xalqımıza və şəhidlərimizin ruhuna ən böyük ehtiram idi. Beynəlxalq ictimaiyyətə isə Azərbaycanın iradəsini və gücünü göstərən mesaj idi.
Xüsusilə Xocalı soyqırımının yaşandığı şəhərdə Bayrağın dalğalanması, Azərbaycan tarixində yeni mərhələnin başlanğıcı oldu. Bu həm də ədalətin gec də olsa qələbəsidir.
Azərbaycan Prezidentinin azad olunmuş torpaqlara hər bir səfəri yalnız simvolik xarakter daşımır, həm də dövlət siyasətinin mahiyyətini ortaya qoyur. Cənab Prezident İlham Əliyevin Xankəndiyə səfərləri, dövlətin suverenlik prinsipinə sadiqliyinin bariz nümunəsidir.
“Böyük Qayıdış” proqramının real addımlarla həyata keçirildiyini göstərən siqnal, erməni separatizminin birdəfəlik sona çatdığının siyasi təsdiqi kimi tarixə düşüb.
Bu səfərlər həm də xalqla dövlət başçısı arasında birliyin, güclü siyasi iradənin və liderlik fenomeninin göstəricisidir. Azərbaycan vətəndaşı artıq əmindir ki, dövlət başçısının rəhbərliyi ilə işğaldan azad olunmuş bütün ərazilərimiz qısa zamanda yenidən dirçələcək.
20 sentyabr Azərbaycan tarixində yalnız hərbi qələbənin deyil, həm də milli qürurun, dövlətçilik prinsipinin təntənəsi günüdür. İkinci dəfə qeyd olunan bu gün bir daha göstərir ki, Azərbaycanın suverenliyi danılmazdır, torpaqlarımız üzərində heç bir separatizmə, işğalçılığa yer yoxdur.
Müzəffər Ali Baş Komandan İlham Əliyevin dəmir iradəsi sayəsində Qarabağ əbədi olaraq Azərbaycanındır.
Bu gün həm qələbə sevinci, həm də şəhidlərimizin ruhuna ehtiram günüdür. Azərbaycan xalqı 20 sentyabrı daim qürurla yad edəcək və gələcək nəsillərə bu tarixi zəfəri örnək kimi ötürəcək.
Nicat İsmayılov
YAP Yasamal rayon təşkilatı “Akim Abbasov küç.73E” ünvanı üzrə ərazi partiya təşkilatının sədri
13:27 18.09.2025
Oxunuş sayı: 12286
