Yüksək istilər nəticəsində havadakı ozon çirkliliyi artıb
Yüksək istilər insan sağlamlığı üçün yeni təhlükə yaradıb. Mütəxəssislər bildirirlər ki, havadakı ozon qazının miqdarı kritik həddi keçib. Təmiz Hava Hüququ Platformasının (THHP) yaydığı məlumata görə, xüsusilə yay aylarında, xüsusən də iyulda aparılan ölçümlər yer səthinə yaxın ozon səviyyəsinin normadan artıq olduğunu göstərir.
Crossmedia.az xəbər verir ki, bu barədə “Haber Global” məlumat yayıb.
Ozon qazı birbaşa mənbədən deyil, günəş şüaları və yüksək istilik təsiri ilə bəzi çirkləndiricilərin reaksiyası nəticəsində yaranır. Sənaye müəssisələri, avtomobil tullantıları və istilik elektrik stansiyalarından çıxan azot oksidi (NOx), uçucu üzvi birləşmələr (VOC) və karbonmonoksit günəş işığında reaksiya verərək ozonun yaranmasına səbəb olur.
Həkimlər xəbərdarlıq edirlər ki, yer səthinə yaxın olan ozon nəfəs yollarında qıcıqlanma, ağciyər funksiyalarında zəifləmə, astma tutmaları və ürək-damar problemlərinə yol aça bilər. Xüsusilə uşaqlar, yaşlılar və tənəffüs yolu xəstəlikləri olan şəxslər üçün bu vəziyyət daha təhlükəlidir.
Ekoloqlar qeyd edirlər ki, havadakı ozon çirkliliyi ilə bağlı ölçmə və məlumatlandırma sistemləri təkmilləşdirilməli, ictimaiyyət bu mövzuda daha çox maarifləndirilməlidir. Mütəxəssislər həmçinin nəqliyyatda və sənayedə hava çirkliliyini azaltmaq üçün ciddi tədbirlərin görülməsinin vacibliyini vurğulayırlar.
Nigar Rəhimova
02:03 06.08.2025
Oxunuş sayı: 1018
