Deputat: "Suriya ilə əlaqələrin gücləndirilməsi çox vacib, strateji addımdır”
Azərbaycan, Qətər, Suriya və Türkiyə arasında həyata keçirilən yeni enerji layihəsi regionda sabitlik və rifahın möhkəmləndirilməsi yolunda mühüm addım kimi dəyərləndirilir. Bu təşəbbüs çərçivəsində Azərbaycan qazı Türkiyə ərazisindən Suriyanın Hələb bölgəsinə nəql olunacaq. Gündəlik 6 milyon kubmetr ötürmə gücünə malik boru kəməri vasitəsilə Hələb Elektrik Stansiyasının fəaliyyəti yenidən təmin ediləcək və Suriyada elektrik təchizatı əhəmiyyətli dərəcədə artacaq.
Dörd ölkənin birgə açıqlamasında bu əməkdaşlıq yalnız enerji sahəsində deyil, həm də diplomatik və humanitar sahədə regional həmrəyliyin və ortaq iradənin göstəricisi kimi təqdim olunur. Layihə Azərbaycanın münaqişədən sonrakı bərpa proseslərinə verdiyi strateji dəstəyin bariz nümunəsi olmaqla yanaşı, ölkəmizin beynəlxalq arenada artan nüfuzunu da bir daha ortaya qoyur.
Bu barədə Crossmedia.az-a açıqlama verən Milli Məclisin deputatı Elşad Musayev bildirib ki, Azərbaycan qazının Türkiyə vasitəsilə Suriyaya nəql olunması ilk növbədə Bakınınbeynəlxalq nüfuzunun artması və iqtisadi gücü ilə bağlıdır: “Yeni dünya düzəni qurulur. Strateji baxımdan dövlətlər öz gələcəklərini müəyyən etməlidirlər. Azərbaycan bir neçə il əvvəl Türkiyə ilə "Şuşa Bəyannaməsi" imzalayıb. Türkiyə ilə bizim qardaşlıq və müttəfiqlik münasibətlərimiz var. Eyni zamanda, Azərbaycan həm bölgədəki dövlətlərlə, həm Yaxın Şərqlə, həm də Avropa ilə paralel iqtisadi əlaqələrini artırmaq əzmindədir. Bu proses əsasən Türkiyə üzərindən həyata keçirilir. Həm Avropaya, həm də Suriya neft-qaz xəttlərinin çəkilməsi düzgün addımlardır. Bundan sonrakı mərhələdə Azərbaycan özünün şimal qonşusu, yəni Rusiyadan asılığını azaltmaq üçün kənd təsərrüfatı məhsullarını və digər məhsullarını da başqa istiqamətlərə yönəltməlidir. Nəzərə almaq lazımdır ki, istənilən vaxt Rusiya Azərbaycanla sərhəddə bir süni baryer yaradır və kənd təsərrüfatı mallarının buraxılmasının qarşısını alır Biz onun da alternativini fikirləşməliyik".
Parlamentari söyləyib ki, Azərbaycanın tarixən Suriya və digər ölkələrlə sıx bağlılığı olub: "Həmin ərazilər vaxtı ilə bizim tarixi dövlətlərimizin tərkibində olub.Məsələn, Füzulinin, Nəsiminin heykəli haradadır? Yəni Azərbaycan çoxlarının təsəvvür elədiyi kimi balaca bir ölkə olmayıb. Bu baxımdan bir az geniş düşünmək lazımdır. Köhnə, itirilmiş əlaqələr bərpa olunmalıdır. Bu baxımdan yanaşdıqda Suriya ilə əlaqələrin gücləndirilməsi çox vacib, strateji addımdır”.
Nigar Mustafa
15:52 04.08.2025
Oxunuş sayı: 1804
