ABŞ tələbə vizalarını sosial mediaya bağladı: Tramp administrasiyasından sərt yoxlama qərarı
ABŞ-da Tramp administrasiyası ölkəyə təhsil məqsədilə gəlmək istəyən xarici tələbələr üçün viza təyinatlarını müvəqqəti olaraq dayandırıb və sosial media hesablarının yoxlanılmasını vacib şərt kimi irəli sürüb.
Crossmedia.az xəbər verir ki, ABŞ Dövlət katibi Marko Rubio bütün səfirlik və konsulluqlara tələbə vizası üçün müraciət edən şəxslərlə görüşləri dayandırmaqla bağlı göstəriş verib.
Məlumata görə, bu qərar, müraciətçilərin sosial media hesabları araşdırıldıqdan sonra viza görüşlərinin yenidən başlanılmasını nəzərdə tutur.
“Departament tələbə və mübadilə vizası üçün müraciət edənlərin yoxlanılması və nəzərdən keçirilməsi üçün cari əməliyyatları və prosesləri qiymətləndirir. Bu çərçivədə bütün bu cür müraciətlərə dair sosial medianın təkmilləşdirilmiş yoxlanışı ilə bağlı təlimatlar hazırlanır”, – deyə administrasiya tərəfindən yayılan açıqlamada bildirilir.
Dövlət Departamentinin sözçüsü Tammy Bruce məsələ ilə bağlı təfərrüatları şərh etməsə də, ümumi mövqeyi açıqlayıb: “Biz bura kimin tələbə olub-olmadığını qiymətləndirmək üçün əlimizdə olan hər vasitədən istifadə etməyə davam edəcəyik”.
Qeyd edək ki, bu qərar artıq təyin olunmuş viza görüşlərinə təsir etməyəcək və yalnız yeni müraciət edənlərə şamil olunacaq. Yeni tətbiq, ABŞ-a daxil olacaq tələbələrin təhlükəsizlik baxımından daha əhatəli şəkildə yoxlanılmasını təmin etmək məqsədi daşıyır.
03:15 28.05.2025
Oxunuş sayı: 11231
