Ermənistan Rusiya və Qərblə münasibətləri balanslaşdırmaq istəyir
Ermənistanın hazırkı hakimiyyəti Rusiya ilə münasibətləri nizama salmağa çalışacaq, eyni zamanda Fransa və ABŞ-lə da əlaqələr qurmağa davam edəcək.
Crossmedia.az xarici KİV-ə istinadən xəbər verir ki, bu barədə Ermənistan parlamentinin sədri bildirib.
“Ermənistanın öz gündəliyi var, Rusiyanın və İranın da öz maraqları mövcuddur. Diplomatiyanın əsas vəzifəsi milli maraqlara xidmət etməkdir. Yalnız bir siyasi xəttə bağlanan ölkələr tarix səhnəsindən silinirlər.
Ermənistanın Fransa və ABŞ-lə dostluq və mehriban qonşuluq münasibətləri var və olacaq. Rusiya ilə münasibətləri nizamlamağa da çalışacağıq. Bu normal prosesdir. Lakin bu, nə Rusiyanın, nə ABŞ-nin , nə də başqa bir ölkənin Ermənistanda öz adamlarını hakimiyyətə gətirməsi və ya ölkə iqtisadiyyatını tam ələ keçirməsi anlamına gəlmir. Məhz buna görə biz balanslı siyasət aparmalıyıq və ifratçılığa yol verməməliyik”, – Simonyan vurğulayıb.
Rusiya ilə münasibətlərdə vəziyyətin normallaşması məsələsinə də toxunan Simonyan, bu prosesin “normal diplomatik iş” olduğunu və hər şeyin təbii axarda davam etdiyini söyləyib.
O, həmçinin vurğulayıb ki, hazırkı hökumət nə Avropa, nə də Rusiya yönümlü deyil, yalnız “erməni maraqlarına” əsaslanan siyasət yürüdür:
“Biz həqiqətən pro-erməni gündəliyini həyata keçiririk və heç bir ifrat yanaşma olmamalıdır. Rusiya ilə münasibətlərdə gündəmdə qalan problemlər var: KTMT-nin sərhədləri haradan keçir, bu təşkilat niyə siyasi səviyyədə belə Ermənistandan uzaqlaşıb, hətta KTMT-yə üzv olan bəzi ölkələr Qarabağda qələbəni birlikdə qazandıqlarını iddia edirlər. Bu və digər suallar hələ də gündəmdədir”, – deyə Simonyan əlavə edib.
Qeyd edək ki, o, hazırkı şəraitdə təhlükəsizlik və iqtisadi sahələrdə əməkdaşlığın diversifikasiyasının son dərəcə vacib olduğunu bildirib.
Fatimə Məmmədova
20:45 27.05.2025
Oxunuş sayı: 506
