Pakistan Hindistanın Baş nazirinin bəyanatlarına sərt reaksiya verdi
Pakistan Xarici İşlər Nazirliyi Hindistanın Baş naziri Narendra Modinin Qucaratda keçirdiyi seçki mitinqində Pakistana qarşı səsləndirdiyi fikirləri "məsuliyyətsiz təxribat" adlandıraraq sərt şəkildə qınayıb.
Crossmedia.az xəbər verir ki, bu barədə "DAWN" nəşri məlumat yayıb.
Bəyanatda bildirilir ki, Pakistan Modingin sözlərini diqqətlə izləyib və bunların nüvə silahına sahib bir dövlətin liderindən gözlənilən təmkinlə deyil, seçki kampaniyasına xas teatrallıqla ifadə olunduğunu vurğulayıb.
“Onun nifrət dolu və zorakılığa çağırış edən bəyanatları təkcə məzmun baxımından deyil, həm də onsuz da gərgin olan region üçün təhlükəli presedent yaratdığına görə narahatlıq doğurur. Hindistan rəhbərliyində siyasi yetkinlik və etik normaların itib getməsi bizi təəssüfləndirir”, – bəyanatda qeyd olunub.
Pakistan Modinin bu cür çıxışlarını Hindistanın Cammu və Kəşmirdəki insan hüquqları pozuntularından və demoqrafik dəyişikliklərindən diqqəti yayındırmaq üçün atılmış addım kimi dəyərləndirib.
XİN, həmçinin bildirib ki, Pakistanın BMT-nin sülhməramlı missiyalarındakı rolu və terrorizmlə qlobal mübarizəyə verdiyi töhfə hər cür düşmən ritorikasından daha önəmlidir.
“Əgər Hindistan hökuməti həqiqətən də ekstremizmdən narahatdırsa, ölkədə artan dini dözümsüzlüyə, azlıqların seçki hüquqlarının əlindən alınmasına və Hindutva ideologiyasının sərtləşməsinə diqqət yetirməlidir”, – deyə vurğulanıb.
Bəyanatın sonunda qeyd olunub ki, Pakistan qarşılıqlı hörmət və suveren bərabərlik əsasında qurulan sülhə sadiq qalır.
Bildirək ki, ölkənin təhlükəsizliyi və ərazi bütövlüyünə yönələn hər hansı təhdidə BMT Nizamnaməsinin 51-ci maddəsinə uyğun olaraq sərt və adekvat cavab veriləcək.
Fatimə Məmmədova
20:21 27.05.2025
Oxunuş sayı: 10954
