Aİ: “Gömrük təklifi hələ də masadadır”
ABŞ-ın son təzyiqlərinə baxmayaraq, Avropa İttifaqı (Aİ) ABŞ-la gömrük rüsumları ilə bağlı təklifinin qüvvədə qaldığını bildirib.
Tramp ötən həftə Aİ-dən idxal olunan məhsullara 50 faiz gömrük rüsumu tətbiq etməklə hədələsə də, Aİ mövqeyini dəyişməyib. İttifaq “sıfır-sıfır” adlanan – hər iki tərəfdən tarifsiz ticarət rejimini, ABŞ-dan enerji, texnologiya və kənd təsərrüfatı məhsullarının alınmasını əhatə edən təklifini yenidən gündəmə gətirib.
Crossmedia.az xarici mediaya istinadən bildirir ki, Aİ-nin ticarət sözçüsü Olof Gill bazar ertəsi çıxışında “Sıfıra sıfır təklifi hələ də masadadır” deyərək bunun Atlantik okeanının hər iki tərəfi üçün faydalı başlanğıc nöqtəsi olduğunu bildirib.
Tərəflər ötən həftə qarşılıqlı məktublar vasitəsilə danışıqlara başlamağa razılaşıblar. Lakin Tramp bu prosesin nəticəsiz olduğunu deyərək iyunun 1-dən Aİ-yə idxal edilən məhsullara 50 faiz rüsum tətbiq edəcəyini elan edib.
AB-nin ticarət komissarı Maroš Şefçoviç ilə ABŞ-ın nümayəndəsi Howard Lutnick arasında keçirilən telefon danışığında Aİ təklifləri “real olmayan və ədalətsiz” adlandırıb. Tramp isə bazar günü Ursula von der Leyenlə görüşdən sonra tarif qərarını iyulun 9-dək təxirə salmağa razılaşıb.
Komissiya sözçüsü Paula Pino bildirib ki, tərəflər danışıqları sürətləndirmək barədə razılığa gəliblər.
Hazırda ABŞ Aİ-dən idxal olunan polad, alüminium və avtomobillərə 25 faiz, digər məhsullara isə ümumilikdə 10 faiz tarif tətbiq edir. Aİ-yə üzv ölkələr isə ABŞ-ın Böyük Britaniya ilə əldə etdiyi razılaşmanın İttifaq üçün keçərli olmadığını bildiriblər.
Əgər tərəflər arasında razılıq əldə olunmasa, Aİ-nin 95 milyard avro dəyərində ABŞ məhsullarına gömrük rüsumları tətbiq etməyi nəzərdə tutan yeni paketi hazır vəziyyətdə saxlanılır. Bu paket, əvvəlki 21 milyard avroluq məhsul siyahısını da genişləndirəcək.
Şefçoviç və Lutnickin bazar ertəsi günortadan sonra yenidən görüşəcəyi gözlənilir.
Zəhra Ağayeva
15:30 27.05.2025
Oxunuş sayı: 1045
