Tramp Anım Günündə ABŞ əsgərlərini yad etdi
ABŞ Prezidenti Donald Tramp Arlinqton Milli Qəbiristanlığında keçirilən mərasimdə döyüşlərdə həlak olmuş əsgərləri “Amerikanın ən yaxşı və ən cəsurları” adlandırıb.
Trampla yanaşı, vitse-prezident JD Vens və müdafiə naziri Pit Heqset də mərasimdə iştirak ediblər. Onlar həlak olmuş əsgərlərin xatirəsini anmaq üçün Naməlum Əsgərin məzarına əklil qoyublar.
Crossmedia.az xarici mediaya istinadən bildirir ki, mərasim Virciniya ştatının Arlinqton şəhərində, 400 mindən çox əsgərin dəfn olunduğu Arlinqton Milli Qəbiristanlığında baş tutub. Tramp çələng qoyduqdan sonra bir neçə anlıq səssizliklə ehtiramını bildirib.
Prezident çıxışında ABŞ əsgərlərini “böyük döyüşçülər” adlandırıb və onların hekayələrinin unudulmaması üçün ailələri və yaxınları ilə paylaşılacağını vəd edib.
“Biz onların inanılmaz irsinə hörmət edirik. Onları əbədi şöhrətləri ilə salamlayırıq. Millətimizi daha güclü, qürurlu və azad etdikcə onların irsini yaşatmağa davam edəcəyik,” – deyə Tramp qeyd edib.
Prezident, Suriyada kamikadze hücumu nəticəsində həyatını itirən hərbi dəniz qüvvələrinin baş kiçik zabiti Şennon Kentin hekayəsini də bölüşüb. Beşinci tur xidmətdə olan Kent, xüsusi təyinatlılarla birgə İŞİD-ə qarşı əməliyyatda iştirak edirdi. Tramp Kentin ailəsini mərasimdə alqışlamağa çağıraraq onun xidmətlərini yüksək qiymətləndirib.
Mərasimin sonunda Tramp çıxışını siyasi mövzuya yönəldib. O, keçmiş prezident Co Baydeni sərt tənqid edib və Bayden administrasiyasını uğursuzluqlarla ittiham edib. Tramp bildirib ki, dörd çətin ildən sonra ABŞ-ı yenidən dirçəldib.
Anım Gününə sosial şəbəkədə də reaksiya verən Tramp “Truth Social” platformasında Baydenə qarşı sərt ifadələrlə dolu paylaşım edib.
Zəhra Ağayeva
14:50 27.05.2025
Oxunuş sayı: 1775
