Aİ ölkələri Komissiyanın Ukrayna ilə razılaşma səylərindən narazıdır
Avropa İttifaqının kənd təsərrüfatı nazirləri Avropa Komissiyasının Ukrayna ilə azad ticarət sazişi üzrə nəticə əldə etməməsindən məyus olduqlarını bildiriblər.
İyunun 5-də müddəti bitəcək müvəqqəti ticarət razılaşmasının əvəzində Komissiyanın Ukrayna ilə uzunmüddətli razılaşma imzalamağa dair uğursuz cəhdləri Brüsseldə keçirilən qapalı iclasda narazılıq yaradıb. Nazir nümayəndələri bildiriblər ki, Komissiyanın kifayət qədər vaxtı olsa da, razılığa gələ bilməməsi məyusedicidir.
Crossmedia.az xarici mediaya istinadən bildirir ki, hazırda Aİ və Ukrayna arasında ticarət Avtonom Ticarət Tədbirləri (ATM) çərçivəsində aparılır. Lakin bu proqramın müddəti uzadıla bilməz və Komissiya aralıq tədbirlərlə vəziyyəti idarə etməyə çalışır. Polşanın kənd təsərrüfatı naziri Çeslav Siekierski danışıqların ilkin mərhələdə olduğunu təsdiqləyib. Aİ-nin Kənd Təsərrüfatı üzrə Komissarı Kristof Hansen isə bildirib ki, hər iki tərəf üçün proqnozlaşdırıla bilənlik vacibdir və balanslaşdırılmış razılaşma üzərində iş aparılır.
Ukraynanın kənd təsərrüfatı naziri Vitali Koval isə Aİ-ni təcili addım atmağa çağırıb və bildirib ki, ölkəsinin iqtisadiyyatının böyük hissəsi bu sektordan asılıdır. O, Ukraynanın Avropa dəyərlərini müdafiə etdiyini vurğulayaraq, müharibənin kənd təsərrüfatına vurduğu milyardlarla avroluq zərərləri diqqətə çatdırıb.
Zəhra Ağayeva
15:00 27.05.2025
Oxunuş sayı: 1883
