ABŞ-ın dəstəklədiyi yardım Qəzzaya çatdırılıb – BMT narazıdır
Qəzza Humanitar Fondu (GHF) bazar ertəsi Qəzzada yeni yardım paylama sistemini işə salıb. ABŞ-ın dəstəklədiyi bu təşəbbüs BMT və digər beynəlxalq təşkilatlar tərəfindən tənqid olunub. Onlar bu strukturun səmərəsiz olduğunu və fələstinlilərin didərgin düşməsinə səbəb ola biləcəyini bildiriblər.
Crossmedia.az xarici mediaya istinadən bildirir ki, yardım Qəzzanın cənub və mərkəzində yerləşən dörd mərkəzə çatdırılıb. Qida, su və gigiyena dəstlərindən ibarət yardımın birbaşa və özəl podratçılar vasitəsilə çatdırılması planlaşdırılır. GHF yardımın gündəlik artacağını bildirib.
Lakin layihənin icraçı direktoru Ceyk Vud humanitar prinsiplərin pozulması riski səbəbindən bir gün əvvəl istefa verib. O, “qərəzsizlik və neytrallıq” kimi prinsiplərin təhlükə altında olduğunu bildirib.
BMT, HƏMAS və digər qurumlar yeni sistemin müharibə edən tərəflərin yardıma nəzarət etməsinə şərait yaratdığını və bunun beynəlxalq humanitar hüquqa zidd olduğunu qeyd edirlər. ABŞ və İsrail isə bu təşəbbüsü Həmasın yardımı mənimsəməsinin qarşısını almaq üçün dəstəklədiklərini bildirirlər.
Zəhra Ağayeva
14:30 27.05.2025
Oxunuş sayı: 1412
