“Azərbaycan Xalq Cümhuriyyəti ürəklərdə elə bir məşəl alovlandırdı ki…” - Deputat
Azərbaycanın şanlı tarixinin qızıl səhifələrindən biri də Şərqdə ilk dəfə respublika idarəetmə formasının məhz ölkəmizdə – Azərbaycan Xalq Cümhuriyyəti şəklində yaranmasıdır. Demokratik prinsiplərə və Qərb ideallarına əsaslanan bu dövlət, Şərqdə ilk dəfə olaraq yeni idarəçilik modelini tətbiq edərək, bölgədə mühüm bir dönüş nöqtəsi yaratdı. Azərbaycan Xalq Cümhuriyyəti qadın və kişilərə qanun qarşısında bərabər hüquqlar tanımaqla, təkcə ölkə daxilində deyil, həm də beynəlxalq səviyyədə qabaqcıl və humanist dövlətçilik nümunəsi sərgilədi. Bu, həm quruluş baxımından demokratik dəyərlərə sadiqliyin, həm də vətəndaşlara verilən yüksək dəyərin göstəricisi idi.
28 Mayla bağlı Milli Məclisin deputatı Aydın Hüseynov Crossmedia.az-a açıqlamasında bildirib ki:
“Müsəlman Şərqində ilk demokratik cümhuriyyətin Azərbaycanda yaranması xalqımızın milli müstəqillik və azadlıq duyğularından qaynaqlanır. Xalqımızın qabaqcıl şəxsiyyətlərinin, mütəfəkkir adamlarının, ziyalılarının xalqımızda milli azadlıq, milli müstəqillik duyğularını gücləndirməsi, milli dirçəliş, milli oyanış əhvali-ruhiyyəsini yayması məntiqi olaraq, Azərbaycan Demokratik Cümhuriyyətinin yaranmasına gətirib çıxarmışdır”.
Deputat həmçinin qeyd edib ki:
“Cümhuriyyətin yaradıldığı dövr çox çətin, ziddiyyətli və mürəkkəb olub: “Cəmiyyətimizin müstəqillik, demokratiya barədə formalaşmış şüuru, əhval-ruhiyyəsi sonrakı dövrlərdə xalqımızın qəlbində yaşamış və nəhayət, bu əsrin sonunda xalqımızı dövlət müstəqilliyinə gətirib çıxara bilmişdir. Bu gün 28 May Gününü böyük iftixar hissi ilə bayram edirik. Bu, bizim milli bayramımızdır. İlk dəfə müstəqil Azərbaycan dövlətinin və demokratik cümhuriyyətin bütün dünyaya elan olunması ilə milli azadlığın gələcəyi üçün böyük əsas və təməl qoyulub. Bu gün o ağır və çətin şəraitdə Azərbaycan xalqının qabaqcıl və mütəfəkkir insanlarının xidmətlərini böyük minnətdarlıq hissi ilə qeyd edirik. Onların xidmətləri Azərbaycanın tarixinə həkk olunub və bu xidmətlər heç vaxt unudulmayacaq. Ömrü cəmi 23 ay çəkən Azərbaycan Xalq Cümhuriyyəti ürəklərdə elə bir məşəl alovlandırdı ki, təqribən, 70 il ərzində hökmranlıq etmiş sovet rejiminin amansız repressiya maşını da bu məşəli söndürə bilmədi. XX əsrin 80-ci illərinin ortalarından etibarən Azərbaycanda baş qaldıran milli oyanış dalğası əzəmətli xalq hərəkatına çevrildi. Özünü Cümhuriyyətin varisi elan edən Azərbaycan Respublikası 1991-ci ildə yenidən dövlət müstəqilliyinə qovuşdu. Ulu Öndər Heydər Əliyev siyasətinin davamı olaraq ölkə daxilində və xaricində kimliyindən asılı olmayaraq hər bir azərbaycanlı əsası 1918-ci il may ayının 28-də qoyulmuş Azərbaycan Xalq Cümhuriyyətini və onun qurucularını hörmət və ehtiramla yad edir”.
Ayhan Ağarzayev
14:17 26.05.2025
Oxunuş sayı: 7516
