“Sülh sazişindən əvvəl ATƏT-in Minsk qrupu ləğv edilməlidir” - Deputat
Azərbaycan Prezidenti İlham Əliyev bildirib ki, Ermənistanla sülhün əldə olunması üçün iki əsas şərt mövcuddur və rəsmi İrəvan gec-tez bu şərtlərlə razılaşacaq. Dövlət başçısı bu fikirləri Macarıstanın Baş naziri Viktor Orbanla birgə keçirdiyi mətbuat konfransında səsləndirib.
Milli Məclisin deputatı Hikmət Babaoğlu Ermənistan və Azərbaycan arasında mümkün sülh prosesi ilə bağlı Crossmedia.az-a açıqlama verib.
O qeyd edib ki, Azərbaycan Prezidenti İlham Əliyev Macarıstanda keçirilən mətbuat konfransında bir daha müharibədən sonra sülhün təşəbbüskarının Azərbaycan olduğunu vurğulayıb və bu mövqe ilə bağlı fikirlərini ortaya qoyub.
Deputatın sözlərinə görə, hazırda sülhə gedən yolda hələ də iki ciddi maneə qalmaqdadır. Bunlardan birincisi Ermənistanın Konstitusiyasında Azərbaycanın ərazi bütövlüyünə qarşı yönəlmiş müddəaların aradan qaldırılması məsələsidir. İkincisi isə ATƏT-in Minsk qrupunun ləğv olunması zərurətidir. Hikmət Babaoğlu bu iki amilin aradan qalxmasının sülhə gedən yolun açılması üçün vacib olduğunu bildirib.
H.Babaoğlu vurğulayıb ki, əslində, ATƏT-in Minsk qrupu hazırda sülhün qarşısında duran əsas maneələrdən biridir. Onun sözlərinə görə, bu qurum münaqişənin həlli üçün yaradılıb, lakin münaqişəni həll edə bilməyib. Münaqişəni Azərbaycan özü həll edib. “Münaqişəni Azərbaycan özü həll edib, Minsk qrupunun mövcudluğu isə sülhə maneədir,” – deyə deputat qeyd edib.
Deputatın fikrincə, Minsk qrupunun fəaliyyətinin davam etməsi, əslində, münaqişənin hələ də bitmədiyini göstərmək cəhdidir. Bu isə gələcəkdə əldə olunacaq sülh sazişinin legitimliyini sual altına sala bilər. Hətta Minsk qrupuna üzv olan 26 dövlət və həmsədrlər belə deyə bilər ki, “Siz bu məsələni iki tərəfli qaydada həll etmisiniz, amma ATƏT-in Minsk Qrupu məsələnin bitmədiyini göstərir". Hikmət Babaoğlu hesab edir ki, bu baxımdan Minsk qrupunun fəaliyyət göstərməsi siyasi məntiqə ziddir.
Hikmət Babaoğlu bildirib ki, Ermənistanın baş naziri Nikol Paşinyanın dediyi kimi, sülh müqaviləsinin imzalanmasından sonra Minsk qrupunun ləğv edilməsi mümkün deyil. Əksinə, sülh sazişinə gedən yolda bu qrup əvvəlcədən ləğv edilməlidir: "Sülh sazişindən çox öncə, lap elə indi ATƏT-in Minsk qrupu ləğv edilməlidir ki, sülh sazişi üçün yol açılsın”.
Deputat əlavə edib ki, Ermənistan bu iki şərtlə – Konstitusiyada dəyişiklik və Minsk qrupunun ləğvi – gec-tez razılaşmalı olacaq. Onun fikrincə, sülhün əldə olunması Ermənistanın qərarından asılıdır: nə vaxt Ermənistan qərar verərsə ki, Konstitusiyasını dəyişsin və Minsk qrupunun ləğv olunmasına razılıq versin, o zaman sülh də əldə olunacaq.
Hikmət Babaoğlu vurğulayıb ki, Ermənistan sadəcə bəyanatlarla kifayətlənməməli, real addımlar atmalıdır. O bildirib: “Boş yerə ‘mən sülh istəyirəm’ deməkdənsə, Ermənistan real addımlar atmalıdır.” Deputatın fikrincə, sülhün tez və ya gec baş tutması Ermənistanın bu addımları atmağa nə vaxt hazır olmasından asılı olacaq.
Fatimə Nəbiyeva
19:33 20.05.2025
Oxunuş sayı: 996
