TBMM sədri: "Azərbaycanla əməkdaşlığımızı hər sahədə gücləndirmək istəyirik"
Türkiyə Böyük Millət Məclisinin (TBMM) sədri Numan Kurtulmuş Azərbaycan Respublikası Prezident Administrasiyasının Siyasi partiyalar və qanunverici orqanlarla əlaqələr şöbəsinin müdiri Ədalət Vəliyev və onu müşayiət edən nümayəndə heyətini qəbul edib.
Crossmedia.az xəbər verir ki, bu barədə TBMM məlumat yayıb.
Qəbul zamanı Kurtulmuş bildirib ki, Şuşa Bəyannaməsi ilə müttəfiqlik səviyyəsinə yüksələn Türkiyə-Azərbaycan münasibətlərinin daha da inkişaf etdirilməsinə böyük önəm verilir. O, bu əlaqələrin gücləndirilməsində parlament diplomatiyasının xüsusi rol oynadığını vurğulayıb.
TBMM sədri əlavə edib ki, istər parlament, istərsə də digər səviyyələrdə yaradılan əməkdaşlıq mexanizmlərinin inkişaf etdirilməsinə və bu çərçivədə əməkdaşlığın dərinləşdirilməsinə xüsusi diqqət yetirilir.
Görüşdə AK Partiyanın qrup sədr müavini Bahadır Nahit Yenişehirlioğlu, partiyanın xarici əlaqələr üzrə sədr müavini və İstanbul millət vəkili Zafer Sırakaya, İYİ Partiyanın qrup sədr müavini Buğra Kavuncu, Türkiyə-Azərbaycan parlamentlərarası dostluq qrupunun rəhbəri, AK Partiyanın Konya millət vəkili Orhan Erdem, qrupun üzvü MHP Kayseri millət vəkili İsmail Özdemir və Azərbaycanın Ankaradakı səfiri Rəşad Məmmədov da iştirak ediblər.
Fatimə Məmmədova
18:09 20.05.2025
Oxunuş sayı: 779
