Ekspert perspektivi dəyərləndirdi: "Aİ - Azərbaycan əlaqələri canlandırılır"
Azərbaycanın xarici işlər naziri Ceyhun Bayramov Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallasla keçirilən birgə mətbuat konfransında deyib ki, rəsmi Bakı adı çəkilən qurumla yeni saziş üzrə yaxın vaxtlarda əməli addımlar atılması barədə razılıq əldə olunub.
Onun sözlərinə görə, Aİ ilə Azərbaycan arasında yeni sazişi əhatə edən məsələlərin 90-95 faizi razılaşdırılıb:
"Son illər bu məsələdə durğunluq müşahidə olunurdu. Bu gün yenidən məsələni müzakirə etdik və sazişi tamamlamaq üçün əməli addımlar atmaq barədə razılığa gəldik. Açıq qalan məsələlər iqtisadiyyat və ticarət sahəsini əhatə edirdi. Saziş növbəti mərhələdə daha da zənginləşdirilə bilər”.
Tərəflər arasında əlaqələrin perspektivi barədə Crossmedia.az-a danışan politoloq, Beynəlxalq Münasibətlərin Təhlili Mərkəzinin əməkdaşı Vasif Hüseynov bildirdi ki, Azərbaycanla Avropa arasındakı münasibətlər hazırda yenidən canlandırılır və bu, münasibətlərdə yeni bir səhifənin açılması deməkdir: “Bu, çox təbiidir. Azərbaycan və Aİ arasında enerji, nəqliyyat, iqtisadi və siyasi sahələrdə dərin əməkdaşlıq var və bu əməkdaşlıq davam etməkdədir. Azərbaycan Avropa İttifaqının enerji təhlükəsizliyində mühüm rol oynayır. Bu baxımdan, münasibətlərin canlandırılması gözlənilən idi”.
V.Hüseynov qeyd edib ki, yeni mərhələdə əməkdaşlıq mövcud əsaslar üzərində daha da inkişaf etdiriləcək. O, xüsusilə siyasi sahədəki əngəllərin aradan qaldırılmasının vacibliyinə diqqət çəkib: “İndiyədək Aİ-nin bəzi strukturlarında, o cümlədən Avropa Parlamentində və keçmiş Ali Nümayəndə Josep Borrell tərəfindən Azərbaycanın maraqlarına zidd, qərəzli yanaşmalar müşahidə olunurdu. Bu, ikitərəfli münasibətlərdə müəyyən gərginliklərə səbəb olub. Bizim əsas gözləntimiz ondan ibarətdir ki, bundan sonra Avropa İttifaqı regionda obyektiv və qərəzsiz mövqe sərgiləsin”.
Politoloqun fikrincə, Azərbaycanın maraqlarına və narahatlıqlarına həssas yanaşılan təqdirdə, qarşılıqlı etimad bərpa oluna və tərəfdaşlıq daha da dərinləşdirilə bilər: "Aİ-nin yeni rəhbər strukturlarında bu istiqamətdə müsbət siqnallar var. Əgər bu dinamika davam edərsə, enerji və nəqliyyat başda olmaqla bir çox sahələrdə əməkdaşlığın inkişafı mümkündür”, – deyə o bildirib.
Qeyd edək ki, Azərbaycan və Avropa İttifaqı arasında 1996-cı ildən qüvvədə olan Tərəfdaşlıq və Əməkdaşlıq Sazişinin yenilənməsi istiqamətində danışıqlar uzun illərdir davam edir. Yeni sənədin hər iki tərəfin maraqlarını əhatə edən daha geniş çərçivəni nəzərdə tutması gözlənilir.
Toğrul Əhmədzadə
16:06 25.04.2025
Oxunuş sayı: 3059
