“Süni intellekt insanları işsiz qoya bilər” – "Anthropic" mütəxəssisindən proqnoz
Süni intellektin sürətli inkişafı gələcəkdə insanların böyük əksəriyyətini əmək bazarında rəqabət aparmaq imkanından məhrum edə və kütləvi işsizliyə səbəb ola bilər.
Crossmedia.az xəbər verir ki, bu barədə “Anthropic” şirkətinin süni intellekt təhlükəsizliyi üzrə mütəxəssisi Tao Linq proqnoz verib.
Onun fikrincə, 2027-ci ilin sonunadək neyron şəbəkələr demək olar ki, bütün peşə sahələrində dünyanın ən yaxşı mütəxəssisləri ilə eyni səviyyəyə çata və ya onları geridə qoya bilər.
Linq hesab edir ki, perspektivdə insanların əksəriyyəti əmək bazarında maşınlarla rəqabət apara bilməyəcək. Bununla belə, kütləvi işdən çıxarmaların dərhal baş verməsi gözlənilmir. Çünki iş yerlərinin tam avtomatlaşdırılması üçün çoxlu sayda robotun istehsalı və tətbiqi tələb olunur.
Mütəxəssis süni intellektin qərarvermə prosesində insan nəzarətindən çıxması ehtimalını təxminən 20 faiz qiymətləndirib. Bununla yanaşı, onun fikrincə, süni intellektin insanları fiziki olaraq məhv etməsi daha az ehtimal olunan ssenaridir.
Xatırladaq ki, “Anthropic” şirkətinin rəhbəri Dario Amodei daha əvvəl süni intellektin yaxın beş il ərzində başlanğıc səviyyəli ofis işlərinin yarısına qədərini aradan qaldıra və işsizliyi 10-20 faizə yüksəldə biləcəyini bildirmişdi.
Bununla belə, “Anthropic”in öz araşdırması hələlik süni intellekt səbəbindən kütləvi işsizliyin artdığını təsdiqləməyib. Lakin gənc mütəxəssislərin işə qəbulunda artıq müəyyən yavaşlama müşahidə olunur.
00:01 22.11.2026
Oxunuş sayı: 68