Qırğızıstan səfiri maddi-texniki yardıma görə Azərbaycana təşəkkür edib
Qırğızıstanın Bakıdakı səfiri, ölkəsinin Fövqəladə Hallar Nazirliyi üçün xüsusi texnikanın təhvil verilməsi mərasimində çıxış edərək Azərbaycan rəhbərliyinə, xüsusilə də Prezident İlham Əliyevə dərin minnətdarlığını bildirib.
Crossmedia.az-ın məlumatına görə, Səfir Maksat Mamıtkanov, həmçinin Azərbaycan xalqına və Fövqəladə Hallar Nazirliyinin rəhbərliyinə Qırğızıstana növbəti humanitar yardımı göndərdiklərinə görə təşəkkür edib.
Bu gün Azərbaycanın Fövqəladə Hallar Nazirliyi Qırğızıstana 10 ədəd "KamAZ" yanğınsöndürmə avtomobili təhvil verib.
"Bu, qardaş xalqlarımız arasındakı bağların möhkəmləndiyinin və gələcəkdə daha da güclənəcəyinin əsl sübutudur. Bu, həmçinin liderlərimizin – prezidentlərimizin müəyyən etdiyi siyasi kursun, türk qardaşlığımızın daha da möhkəmlənməsi üçün yaradılan şəraitin bariz nümunəsidir" – deyə səfir jurnalistlərə açıqlamasında bildirib.
Qırğızıstan səfirinin sözlərinə görə, bu yardım hazırda onun ölkəsi üçün həqiqətən çox vacibdir. "Məhz yaz aylarında sel və digər fövqəladə halların başvermə ehtimalı yüksəkdir. Xüsusi texnika Qırğızıstanın Fövqəladə Hallar Nazirliyinin maddi-texniki bazasının gücləndirilməsi üçün olduqca vacibdir" – deyə Mamıtkanov vurğulayıb.
Zəhra Məmmədova
12:08 22.03.2025
Oxunuş sayı: 1191
