İsrailin müdafiə nazirindən xəbərdarlıq: HƏMAS girovları azad etməsə...
İsrailin müdafiə naziri İsrael Katz HƏMAS-ın girovları azad etməməsi halında Qəzzada yeni ərazilərin ələ keçiriləcəyini və ilhaq ediləcəyini bəyan edib.
Crossmedia.az İsrail mediasına istinadən xəbər verir ki, Katz verdiyi açıqlamada, “HƏMAS girovları azad etməkdən imtina etdikcə, daha çox ərazi itirəcək və həmin ərazilər İsrailin nəzarətinə keçəcək. Mən ordunun əlavə əraziləri ələ keçirməsi, əhalinin təxliyəsi və İsrail icmalarının təhlükəsizliyini təmin etmək üçün təhlükəsizlik zonasını genişləndirməyi əmr etdim”, – deyə o, bildirib.
Nazir əlavə edib ki, İsrail Qəzza zolağında ələ keçirdiyi ərazilər üzərində daimi nəzarət quracaq və girovlar azad olunana qədər quru əməliyyatlarını genişləndirəcək.
Katz İsrailin hərbi əməliyyatlarla yanaşı, mülki təzyiq mexanizmlərini də işə salacağını vurğulayıb. O, ABŞ Prezidenti Donald Trampın Qəzzalılar üçün miqrasiya planını həyata keçirəcəklərini vurğulayıb.
İsrailin bu bəyanatı bölgədəki vəziyyətin daha da gərginləşəcəyini göstərir.
Aybəniz Səfərova
15:48 21.03.2025
Oxunuş sayı: 10013
