ABŞ və İran arasında yeni müharibə ehtimalı gündəmdədir
ABŞ Silahlı Qüvvələrinin İranın Keşm adasında SEPAH-a məxsus olduğu bildirilən raket buraxılış məntəqəsinə zərbə endirməsi regionda hərbi qarşıdurmanın yenidən genişlənə biləcəyi ilə bağlı müzakirələri aktuallaşdırıb. Vaşinqton bu hücumu özünümüdafiə tədbiri kimi təqdim edir və zərbənin Amerika hərbçilərinə və hərbi obyektlərinə qarşı İranın hücumlarına cavab olduğunu bildirir. Hadisədən əvvəl İranın Bəhreyndəki ABŞ hərbi obyektlərinə qarşı dron hücumları həyata keçirdiyi barədə məlumatlar da yayılmışdı.
Digər tərəfdən, ABŞ rəhbərliyi bir neçə gün əvvəl müharibənin başa çatdığını bəyan etmişdi. Belə bir açıqlamadan sonra İran ərazisinə yenidən zərbə endirilməsi Vaşinqtonun regionla bağlı strategiyası və müharibənin faktiki vəziyyəti barədə suallar doğurur. Bu addım həqiqətən təhlükəsizliyin təmin olunmasına yönəlmiş müdafiə tədbiridir, yoxsa ABŞ-nin İrana qarşı hərbi təzyiq siyasətinin davamıdır? Eyni zamanda, bu cür zərbələr tərəflər arasında yeni eskalasiya riskini nə dərəcədə artırır?

Mövzu ilə bağlı Crossmedia.az-a açıqlama verən hərbi jurnalist Heydər Mirzə qeyd edib ki, hazırda faktiki olaraq hər iki tərəfin – bir tərəfdən ABŞ və İsrailin, digər tərəfdən isə İranın mümkün hərbi əməliyyatın üçüncü mərhələsinə hazırlaşdığı barədə müzakirələr gedir: “Birinci və ikinci dalğalardan sonra indi növbəti mərhələnin planlaşdırılmasından danışılır. Hətta söhbət təkcə hazırlıqdan getmir, əməliyyatın artıq həyata keçirilə biləcəyi ilə bağlı fikirlər də səsləndirilir. Təbii ki, burada siyasi amillər də mühüm rol oynayır. İsraildə keçiriləcək seçkilərin və ABŞ-də aralıq seçkilərin nəticələri də bu prosesə təsir göstərə biləcək məqamlardandır. Lakin bütün bunlara baxmayaraq, belə bir ssenarinin gündəmə gəlməsi gözlənilən idi. Dünən gecə baş verən zərbələrə gəlincə, nəzərə almalıyıq ki, İran kifayət qədər qapalı ölkədir və oradakı hadisələrlə bağlı məlumat əldə etmək imkanları məhduddur. Əsasən rəsmi mənbələrə istinad edirik. İranın rəsmi mediasının isə İnqilab Keşikçiləri Korpusu ilə birbaşa əlaqəli olduğunu nəzərə almaq lazımdır. Digər tərəfdən, ABŞ-nin rəsmi mənbələrindən yayılan məlumatlar da hər zaman obyektiv informasiya xarakteri daşımır və daha çox təbliğat üslubunda təqdim oluna bilir”.
Heydər Mirzə qeyd edib ki, əgər həqiqətən də zərbələr endirilibsə, bunlar daha çox müdafiə xarakterli zərbələrdən deyil, mümkün hərbi əməliyyatın başlanmasından əvvəlki hazırlıq mərhələsindən xəbər verir: “Bununla yanaşı, başqa ehtimal da var: ola bilsin ki, məqsəd qarşı tərəfi müəyyən addımlar atmağa təhrik etmək, onu təxribata çəkməkdir. Müharibə şəraitində tərəflərin müxtəlif vasitələrə əl atdığını nəzərə alsaq, bu ehtimalı da istisna etmək olmaz. Ona görə də ilk növbədə öz təhlükəsizliyimiz barədə düşünməliyik. Azərbaycan bütün zəruri təhlükəsizlik tədbirlərini həyata keçirir. Eyni zamanda, ölkəmizin həm ABŞ və İsraillə, həm də İranla diplomatik təmaslarını davam etdirdiyini, Azərbaycan diplomatiyasının hər iki tərəflə sıx əlaqədə olduğunu görürük”.
Ayhan
16:00 19.11.2026
Oxunuş sayı: 59