Yaponiyada güclü zəlzələ – İki yaşayış məntəqəsində təxliyə elan edilib
Yaponiyanın Kumamoto prefekturasında 5,7 maqnitudalı zəlzələ baş verib. Yeraltı təkanlar nəticəsində iki nəfər yaralanıb, bəzi ərazilərdə təxliyə qərarı verilib.
Crossmedia.az xəbər verir ki, bu barədə Yaponiyanın “Kyodo” agentliyi məlumat yayıb.
ABŞ Geoloji Araşdırmalar Mərkəzinin (USGS) məlumatına görə, noyabrın 19-da baş verən zəlzələnin episentri Kumamoto prefekturasının Tsunagi qəsəbəsindən 4 kilometr şimal-qərbdə yerləşib.
Yeraltı təkanlar 10 kilometr dərinlikdə qeydə alınıb.
İlkin məlumatlara əsasən, zəlzələ nəticəsində iki nəfər müxtəlif dərəcəli xəsarət alıb.
Təbii fəlakətdən sonra Minamata şəhərində və Kuma qəsəbəsində əhalinin təxliyəsi barədə qərar qəbul edilib.
Təhlükəsizlik tədbirləri çərçivəsində bəzi sürətli qatar reysləri müvəqqəti dayandırılıb.
Yaponiya rəsmiləri zəlzələ ilə əlaqədar sunami xəbərdarlığının verilmədiyini bildiriblər.
14:21 19.11.2026
Oxunuş sayı: 38