Britaniya İsrailin 8 şirkətinə sanksiya tətbiq edib
Böyük Britaniya İordan çayının işğal altındakı qərb sahilində qanunsuz yəhudi yaşayış məntəqələrinin genişləndirilməsində iştirak edən İsrailin səkkiz şirkətinə qarşı sanksiyalar tətbiq edib.
Crossmedia.az xəbər verir ki, "Reuters" agentliyi bu barədə məlumat yayıb.
Bildirilib ki, sanksiyalar yaşayış məntəqələrinin tikintisi ilə məşğul olan şirkətlərin aktivlərinin dondurulmasını və onların rəhbərlərinə müəyyən məhdudiyyətlərin tətbiqini nəzərdə tutur.
Britaniya hökuməti həmçinin Qəzzaya ərzaq, su və yanacaq daşıyan humanitar yardım avtomobillərinin hərəkətinə dəfələrlə mane olmaqda ittiham edilən İsrailin "Tzav 9" təşkilatına da sanksiya tətbiq edib.
Qərar İsrailin E1 yaşayış məntəqəsi layihəsini genişləndirmək planlarını davam etdirdiyi bir vaxtda qəbul olunub.
Böyük Britaniya hakimiyyətinin qiymətləndirməsinə görə, E1 layihəsinin həyata keçirilməsi İordan çayının qərb sahilini iki hissəyə ayıra, ərazinin Şərqi Qüdslə əlaqəsini məhdudlaşdıra və müstəqil Fələstin dövlətinin yaradılması perspektivlərini zəiflədə bilər.
Britaniyanın xarici işlər naziri Ed Miliband şirkətləri E1 layihəsi üzrə tenderlərdə iştirak etməməyə və qanunsuz yaşayış məntəqələrinin tikintisindən mənfəət əldə etməməyə çağırıb.
Nazir bildirib ki, Londonun əsas məqsədi İsrail və Fələstin dövlətlərinin yanaşı mövcudluğunu nəzərdə tutan iki dövlətli həll imkanlarını qorumaqdır.
Qeyd edək ki, yeni sanksiyalar Böyük Britaniya ilə İsrail arasında yaşayış məntəqələrinin genişləndirilməsi və Fələstin məsələsi ilə bağlı fikir ayrılıqlarının davam etdiyi dövrdə elan olunub.
14:24 17.11.2026
Oxunuş sayı: 107