Fars körfəzində 2 milyon barel neft daşıyan supertanker batıb
Fars körfəzinin cənubunda dəniz minasının partlaması nəticəsində 2 milyon bareldən çox neft daşıyan supertanker batıb. Digər tanker isə Hörmüz boğazında partlayışdan sonra yanmağa başlayıb.
Crossmedia.az xəbər verir ki, bu barədə İran İslam İnqilabı Keşikçiləri Korpusunun (SEPAH) Hərbi Dəniz Qüvvələrinin İctimaiyyətlə Əlaqələr Şöbəsi məlumat yayıb.
İranın dövlət teleradio şirkətinin yaydığı açıqlamada bildirilib ki, partlayış və güclü yanğından sonra tankerlərdən biri Fars körfəzinin cənub sularında batıb.
SEPAH-ın məlumatına görə, hər iki tanker ABŞ hərbçilərinin dəstəyi ilə boğazın cənub marşrutu üzrə gizli keçməyə çalışıb. Bunun üçün gəmilərin identifikasiya və mövqeləşdirmə sistemləri söndürülüb.
Qeyd edək ki, İran Hərbi Dəniz Qüvvələri ərazidəki balıqçılara batmış gəmiyə yaxınlaşmamaq və təhlükəsizlik tədbirlərinə riayət etmək barədə xəbərdarlıq edib. Gəmi sahibləri, dəniz nəqliyyatı şirkətləri və ekipajlara isə Hörmüz boğazının qadağan olunmuş zonasına daxil olmamaq çağırışı edilib.
18:05 15.11.2026
Oxunuş sayı: 169