ABŞ Konqresi məlumat mərkəzlərinin tikintisi ilə bağlı qanun layihəsini müzakirəyə çıxarır
ABŞ Konqresi süni intellekt infrastrukturu üçün məlumat mərkəzlərinin tikintisini tənzimləməyə və elektrik enerjisi xərclərinin artmasının qarşısını almağa yönəlmiş qanun layihəsini müzakirə etməyə hazırlaşır.
Crossmedia.az xəbər verir ki, bu barədə “Reuters” məlumat yayıb.
İkitərəfli dəstəklə hazırlanan “Bipartisan American Affordability and Jobs Act” adlı qanun layihəsinin bazar ertəsi Senatda müzakirəyə çıxarılması gözlənilir. Sənəd yeni elektrik stansiyalarının və ötürücü xətlərin tikintisi üçün icazələrin verilməsini sürətləndirməklə yanaşı, iri məlumat mərkəzlərinin elektrik şəbəkəsinin yenilənməsi xərclərinin daha böyük hissəsini ödəməsini nəzərdə tutur.
Layihənin tərəfdarları bunun süni intellekt infrastrukturunun genişləndirilməsi nəticəsində yaranan əlavə xərclərin istehlakçıların üzərinə düşməsinin qarşısını ala biləcəyini bildirirlər. Sənəddə layihələrin uğursuz olduğu halda ev təsərrüfatlarının, bizneslərin və digər elektrik istehlakçılarının maliyyə yükü ilə üzləşməməsi üçün müddəalar da yer alır.
ABŞ Prezidenti Donald Tramp qanun layihəsini dəstəkləyib və Senatı onun qəbuluna çağırıb. Bununla belə, sənədin taleyi qeyri-müəyyəndir. Ekoloji və yerli qəbilə təşkilatları layihənin ətraf mühitə təsirin qiymətləndirilməsi prosedurlarını zəiflədə və qəbilələrin hüquqlarına xələl gətirə biləcəyini düşünürlər.
Bəzi demokratlar da layihəyə etiraz edirlər. Nümayəndələr Palatasında demokratların lideri Həkim Ceffris sənəddə ekoloji təminatların yetərli olmadığını bildirib. Senator Ron Vayden isə demokratların seçkilərdən sonra əldə etdikləri mövqedən istifadə edərək alternativ razılaşma üzərində işləməli olduğunu vurğulayıb.
İnvestisiya şirkəti “TD Cowen” qanun layihəsinin qəbul olunma ehtimalını seçkilərdən əvvəlki 40 faizlə müqayisədə 25 faiz qiymətləndirib.
09:37 10.11.2026
Oxunuş sayı: 46
