Yadplanetlilərin siqnalı deyil: Uzaq planetdən gələn radio dalğalarının səbəbi açıqlanıb
Yerdən təxminən 63 işıq ili uzaqlıqda yerləşən Beta Pictoris b ekzoplanetindən qeydə alınan radio siqnallarının yerdənkənar həyatın mövcudluğuna işarə etdiyini təsdiqləyən elmi sübut yoxdur. Siqnallar planetin maqnit sahəsi və aurora hadisələri ilə əlaqəli təbii proseslər nəticəsində yarana bilər.
Crossmedia.az xəbər verir ki, bu barədə Anadolu Agentliyinə İstanbul Universitetinin Astronomiya və Kosmik Elmlər bölməsinin astrofizika üzrə müəllimi, dosent Hasan Hüseyin Esenoğlu açıqlama verib.
Alim bildirib ki, son günlər mətbuatda uzaq planetdən radio siqnallarının qəbul edilməsi ilə bağlı yayılan xəbərlər böyük maraq doğursa da, mövcud elmi nəticələr yadplanetli sivilizasiyaların mövcudluğunu təsdiqləmir.
Esenoğlunun sözlərinə görə, söhbət Rəssam (Pictor) bürcü istiqamətində yerləşən Beta Pictoris b ekzoplanetindən gedir. Cənubi Afrikadakı MeerKAT radio teleskoplar sistemi vasitəsilə aparılan müşahidələr zamanı planetin yerləşdiyi istiqamətdən sürətli, təkrarlanan və güclü dairəvi qütbləşməyə malik radio partlayışları, eləcə də davamlı radio şüalanması qeydə alınıb.
Müşahidələr 0,85–3,5 giqahers tezlik diapazonunu əhatə edib.
Alim vurğulayıb ki, bu siqnalları yadplanetlilərdən gələn mesaj kimi qiymətləndirmək üçün elmi əsas yoxdur. Onun fikrincə, şüalanma planetin güclü maqnit sahəsi və auroraların yaranması ilə əlaqəli təbii prosesin nəticəsi ola bilər.
Esenoğlu qeyd edib ki, bu hadisənin yaranmasında güclü maqnit sahələrində işıq sürətinə yaxın sürətlə hərəkət edən yüksək enerjili elektronların iştirak etdiyi siklotron-maser mexanizmi rol oynaya bilər. Bu mexanizm auroralarla əlaqəli radio şüalanmasının yaranmasına səbəb olur.
Tədqiqatın elmi ekspertizadan keçəcəyi təqdirdə, nəticələrin ekzoplanetdən qaynaqlandığı birbaşa müəyyən edilən ilk auroral radio şüalanma müşahidəsi ola biləcəyi bildirilir.
06:18 13.10.2026
Oxunuş sayı: 49
