Əhməd Şəara hakikiyyətdən gedir - Suriya təhlükə ilə üz-üzə
Suriyada keçid dövrünün siyasi gələcəyi və ölkənin idarəçilik modelinin necə formalaşacağı gündəmdə qalmaqda davam edir. Prezident Əhməd əş-Şaraa isə növbəti seçkidə iştirak etmək barədə hazırda qərar vermədiyini, əsas diqqətinin ölkənin idarə olunmasına və əhalinin problemlərinin həllinə yönəldiyini bildirib.
Əş-Şaraa ölkənin sabitliyə qovuşması və qarşıya qoyduğu planların tamamlanması üçün hakimiyyətdə qalmasının zəruri olacağı qənaətinə gələrsə, yenidən namizədliyini irəli sürə biləcəyini də istisna etməyib. Bununla yanaşı, şəxsi olaraq normal həyata qayıtmağa üstünlük verdiyini qeyd edib. Bu açıqlamalar Suriyanın keçid mərhələsindən sonrakı siyasi idarəçiliyinin necə formalaşacağı məsələsini yenidən diqqət mərkəzinə gətirir.
Crossmedia.az-a açıqlamasında Yaxın Şərq məsələləri üzrə ekspert Rufiz Hazifoğlu Suriyadakı siyasi və təhlükəsizlik vəziyyətinin hələ də kövrək olaraq qaldığını bildirib. Onun sözlərinə görə, Əhməd Şəra hakimiyyətdə qalsa da, getsə də, bu, hazırkı mərhələdə Suriyadakı ümumi vəziyyəti köklü şəkildə dəyişməyəcək: “Əhməd Şəra hakimiyyətdə qalsın, getsin, olsun, olmasın, ümumiyyətlə, bu gün Suriyadakı vəziyyət olduqca kövrəkdir. Burada kövrəklik ilk növbədə siyasi istiqrar və eyni zamanda təhlükəsizlik məsələləri ilə bağlıdır. Burada bir İsrail təhlükəsi var ki, davamlı olaraq Suriyanın suveren torpaqlarını bombardman edir. Beynəlxalq ictimaiyyət tərəfindən qəbul olunmuş hökumətə etinasızlıq nümayiş etdirir”.
Rufiz Hazifoğlu Suriyada mövcud vəziyyətə təsir edən digər amillərdən də danışıb: “Uzun illərdir burada, təbii ki, Qolan problemi var. Bununla yanaşı, ölkədə bir druz problemi var ki, İsrail də bu druz kartından mütəmadi olaraq istifadə edir. Digər tərəfdən, hər nə qədər həll olunsa da, burada bir qondarma kürd problemi var idi ki, Suriya Demokratik Qüvvələri arasında PKK-nın Suriya qolu idi. Bütün bunlar ümumi götürəndə Suriyada hakimiyyəti və bugünkü vəziyyəti olduqca kövrək edir. Təbii ki, bütün bunlarla yanaşı, eyni zamanda siyasi istiqrarsızlıq da var”.
Əhməd Şəranın hakimiyyətdə qalıb-qalmamasının hazırkı mərhələdə əsas məsələ olmadığını vurğulayan ekspert ölkədə siyasi müxalifətin də formalaşmadığını bildirib: “İnanın, bu böyük çevrədə, böyük anlamda hələ ki heç bir şeyi dəyişmir. Çünki ölkədə siyasi müxalifət yoxdur. Bəli, bunun üçün zəmin varmı? Yoxdur. Çünki bir zamanlar siyasi və hərbi müxalifət olan qüvvələr artıq hakimiyyətdədir. Yeni siyasi müxalifətin formalaşmasını bugünkü hakimiyyət və ya müvəqqəti hakimiyyət necə qəbul edəcək, o da bəlli deyil”.
Ekspert Suriyada müsbət dəyişikliklərin də müşahidə olunduğunu bildirib. “Ümumilikdə götürəndə, bəli, Suriyada olduqca pozitiv məqamlar var. Çox, heç kimin ağlına gəlməyən və heç kimin təsəvvür edə bilməyəcəyi pozitiv məqamlar var. Məsələn, bu yaxınlarda Asala Nasri adlı tanınmış, məşhur Suriya əsilli müğənninin Suriyada, bugünkü Suriya kimi bir yerdə, konsert verməsi, eyni zamanda kürd dilinin rəsmi status alması, türkmənlərə qarşı yönəlik münasibət, xristianların ilk dəfə Milad bayramını qeyd etməsi və s. Eyni zamanda parlamentdə 12-dən çox, təxminən 20-yə yaxın qadın parlament üzvünün olması təbii ki, müsbət addımlardır”.
Rufiz Hazifoğlu hesab edir ki, sadalanan müsbət dəyişikliklər ölkənin bərpası üçün kifayət deyil: “Ölkəni xilas etmək üçün bunlar kifayət deyil. Çünki sərt, normal iqtisadi proqram olmalıdır. İqtisadi proqram olmadan, kim olur-olsun, istər Bəşər Əsəd olsun, istər Əhməd Şəra olsun, istər digər kimsə olsun, dövləti ayaqda saxlamaq, xüsusən də Yaxın Şərqdə, mümkün olmayacaq”.
Nigar Xəlilli
20:00 23.09.2026
Oxunuş sayı: 47
