Emin Əmrullayev: Təhsil sistemində uzunmüddətli hədəflərlə qısamüddətli nəticələr arasında balans vacibdir
Azərbaycanın təhsil sistemində uzunmüddətli hədəflərlə qısamüddətli nəticələr arasında balansın qorunması vacibdir.
Crossmedia.az xəbər verir ki, bunu “Baku ID 2026” innovasiya festivalında çıxış edən Elm və təhsil naziri Emin Əmrullayev deyib.
Nazir bildirib ki, yalnız uzunmüddətli strategiyaya fokuslanmaq gözlənilməz problemlərin həllində çətinlik yarada bilər. Onun sözlərinə görə, istedad potensialının müəyyən hissəsi əvvəlcədən proqnozlaşdırılması mümkün olmayan problemlərin həllinə yönəldilməlidir.
E. Əmrullayev qeyd edib ki, digər tərəfdən, yalnız qısamüddətli və sürətli nəticələrə hesablanmış strategiya uzunmüddətli perspektivdə daha mürəkkəb problemlərin həllində çətinliklərə səbəb ola bilər.
“Bizim etdiyimiz məhz budur. Son 10 ildən artıq müddətdə Azərbaycanın təhsil sistemi bu iki yanaşma arasında balans yaratmağa çalışıb. Bir tərəfdən, güclü pilot yanaşma tətbiq edilib. Yəni bütün sistem üzrə həyata keçirmək mümkün deyilsə, heç olmasa bunu mümkün olan yerlərdə reallaşdırmaq. Eyni zamanda, beynəlxalq qiymətləndirmələrdə, o cümlədən PISA, PIRLS və TIMSS-də nəticələrimizi yaxşılaşdırmalı olduğumuzu nəzərə almışıq”, – deyə nazir bildirib.
Nazir qeyd edib ki, hazırda hər iki istiqamətdə nəzərəçarpacaq irəliləyişlər müşahidə olunur.
E. Əmrullayev Azərbaycanın təhsil sistemində rəqəmsal bacarıqlar və STEAM istiqamətində həyata keçirilən layihələrə də toxunub.
O bildirib ki, “Rəqəmsal bacarıqlar” layihəsinə bir neçə il əvvəl 5 min şagirdlə başlanılıb. Hazırda isə layihə 600 min şagirdi əhatə edir. Nazir bu göstəricinin Azərbaycanın ümumi təhsil müəssisələrində təhsil alan şagirdlərin, demək olar ki, yarısına bərabər olduğunu qeyd edib.
Nazirin sözlərinə görə, Azərbaycanda STEAM istiqaməti üzrə layihəyə başlanılan zaman təxminən 50 məktəb və bir neçə min şagird əhatə olunurdu. Hazırda isə bu istiqamətdə 300 mindən çox şagirddən söhbət gedir.
“Əsas məsələ kiçik addımlarla başlamaq və sonra irəliləməkdir”, – deyə E. Əmrullayev vurğulayıb.
Elm və təhsil naziri Azərbaycanın son PISA nəticələrinə də münasibət bildirib.
O qeyd edib ki, beynəlxalq qiymətləndirmənin nəticələri ölkənin təhsil sisteminin mövcud vəziyyətini görmək baxımından mühüm göstəricidir. Nazir xüsusilə riyaziyyat üzrə nəticələrə diqqət çəkib və Bakı şəhərinin göstəricilərinin əhali və ölçü baxımından müqayisə oluna bilən bəzi ölkələrin nəticələri ilə dəyərləndirilə biləcəyini bildirib.
E. Əmrullayev çıxışında təhsil sisteminin inkişafında innovasiya, texnologiya və istedadların rolunun vacibliyini bir daha vurğulayıb.
Ayhan
11:33 17.09.2026
Oxunuş sayı: 53
