Azərbaycan-Türkiyə qardaşlığı daha da möhkəmlənəcək - Deputatla müsahibə
44 günlük Vətən müharibəsində əldə etdiyimiz tarixi Zəfər Azərbaycanın yalnız hərbi qüdrətinin deyil, həm də milli iradəsinin, siyasi qətiyyətinin və dövlətçilik ənənələrinin təntənəsi oldu. Bu Qələbəyə aparan yol uzun illər ərzində həyata keçirilən məqsədyönlü siyasət, iqtisadi və hərbi potensialın gücləndirilməsi, milli birliyin möhkəmləndirilməsi və Azərbaycan həqiqətlərinin beynəlxalq ictimaiyyətə çatdırılması ilə səciyyələndi. Zəfərdən sonra isə ölkəmiz regionda və beynəlxalq müstəvidə mövqelərini daha da gücləndirərək yeni geosiyasi reallıqların formalaşmasında mühüm rol oynamağa başladı.
Bu gün Azərbaycanın gücünü şərtləndirən əsas amillərdən biri də cəmiyyəti vahid ideya ətrafında birləşdirən azərbaycançılıq məfkurəsi, milli-mənəvi dəyərlərə bağlılıq və Türkiyə ilə sarsılmaz qardaşlıq münasibətləridir. Qloballaşma və dəyişən beynəlxalq münasibətlər fonunda bu dəyərlərin qorunması, dövlətçilik ənənələrinin gələcək nəsillərə ötürülməsi xüsusi aktuallıq kəsb edir. Bunu Prezident İlham Əliyevin 8 noyabr Zəfər Günündə Xankəndidən verdiyi mesajlarda da görürük.
Türkiyə prezidenti Rəcəb Tayyib Ərdoğanın da Zəfər Günündə Xankəndiyə gəlməsi, iki qardaş ölkənin liderlərinin dünyaya birlik mesajı verməsi Azərbaycanla Türkiyənin arasına nifaq salmaq istəyənlərin oyununu pozdu.
Mövzu ilə bağlı Milli Məclisin deputatı Aydın Mirzəzadə Crossmedia.az-a müsahibə verib:
- Prezident Xankəndidə xalqa müraciətində qeyd etdi ki, Qələbədə hərbi güclə yanaşı milli iradə və siyasi qətiyyət həlledici rol oynayıb. Bu amillər dövlətçilik tariximizdə hansı yeni mərhələni açdı?
- Böyük Qələbəmiz bir çox amillərin vəhdəti və güclənməsi nəticəsində mümkün oldu. Əlbəttə, burada milli birlik, uğurlu daxili və xarici siyasət, eyni zamanda Azərbaycanın öz həqiqətlərini dünya birliyinə çatdıra bilməsi mühüm rol oynadı. Bütün bu amillər bizi Qələbəyə yaxınlaşdırdı. Azərbaycan məğlubiyyətlə barışmadı və bütün resurslarını Qələbənin əldə olunmasına yönəltdi. Ermənistan hesab edirdi ki, Azərbaycan gec-tez məğlubiyyətlə barışacaq, torpaqlarının işğal altında qalmasını qəbul edəcək və nəticədə həmin əraziləri Ermənistana güzəştə gedəcək. Lakin bu, baş vermədi. 2020-ci il sentyabrın 27-də başlayan 44 günlük Vətən müharibəsi torpaqlarımızın işğaldan azad olunmasına, eyni zamanda Azərbaycan həqiqətlərinin dünya ictimaiyyətinə çatdırılmasına imkan yaratdı. Ermənistan kapitulyasiya aktına imza atdı. Bu prosesdə Azərbaycan Prezidenti İlham Əliyevin uzun illər ərzində ölkəni Qələbəyə doğru aparması, qələbə üçün zəruri olan məsələləri vaxtında və ardıcıl şəkildə həll etməsi də mühüm rol oynadı. Azərbaycan əsgəri Ali Baş Komandana inandı və onun rəhbərliyi altında 44 gün ərzində xalqımızın şanlı Qələbəsini təmin etdi.
- Azərbaycanın siyasi, iqtisadi və hərbi baxımdan heç kimdən asılı olmayan güclü dövlət olması hansı strateji amillərə söykənir?
- Azərbaycan ərazi və əhali baxımından nisbətən kiçik ölkələrdən biri olsa da, onun genetik kodunda güclü dövlətçilik ənənələri mövcuddur. Hər bir vətəndaşın milli birliyə öz töhfəsini verməsi də bu baxımdan mühüm rol oynayır. İqtisadiyyatın yenidən qurulması, Azərbaycanın dünya bazarında özünəməxsus yer tutması iqtisadi gücümüzün artmasına gətirib çıxardı. Hərbi quruculuq sahəsində həyata keçirilən tədbirlər, müasir hərbi texnikaların alınması, ordumuzun NATO standartlarına uyğunlaşdırılması və güclü hərbi potensialın formalaşdırılması nəticə etibarilə torpaqlarımızın azad edilməsinə zəmin yaratdı.
- Müharibədən sonra Azərbaycanın beynəlxalq nüfuzu necə genişləndi?
- Azərbaycan dövlətçiliyinin möhkəm əsaslar üzərində qurulması həm Qələbəyə qədər, həm də Zəfərdən sonra gücümüzün artmasına səbəb oldu. Artıq cənab Prezidentin də vurğuladığı kimi, Azərbaycan orta güc dövlətidir. Bu, elə bir gücdür ki, onunla təkcə regionda deyil, beynəlxalq miqyasda da hesablaşırlar. Azərbaycan arzuolunan müttəfiq və tərəfdaşdır. Beynəlxalq təşkilatlarda ölkəmizin nüfuzu durmadan artır, Azərbaycanla birgə fəaliyyət göstərmək istəyən dövlətlərin sayı çoxalır. Bu baxımdan, Azərbaycan bu gün öz fəaliyyətində həm milli dövlətçilik ənənələrini möhkəmləndirir, həm də dünyanın inkişafının əsas elementlərini gündəlik həyatına inteqrasiya edir. Məhz bu strateji yanaşma ölkəmizin müstəqilliyini, iqtisadi və siyasi qüdrətini daha da gücləndirir.
- Zəfərdən sonra azərbaycançılıq ideologiyasının ictimai-siyasi həyatda rolu necə dəyişib və gələcək nəsillərə ötürülməsi üçün nələrə üstünlük verilməlidir?
- Azərbaycanı güclü edən, onun hər bir vətəndaşını birləşdirən əsas amillərdən biri azərbaycançılıq ideologiyasıdır. Azərbaycançılıq bir partiyanın, müəyyən qrupun və ya sinfin ideologiyası deyil, bütövlükdə cəmiyyətin ideologiyasıdır. Bu məfkurə Azərbaycan xalqının keçmişdən gələn dəyərlərini müasir çağırışlarla birləşdirir, dinindən, dilindən, siyasi baxışından və milli mənsubiyyətindən asılı olmayaraq hər kəsi vahid məqsəd ətrafında birləşdirir. Azərbaycançılıq ideologiyası milli dəyərlərimizi və tarixi ənənələrimizi qorumaqla yanaşı, müasirliyin Azərbaycan cəmiyyətində daha da möhkəmlənməsinə xidmət edir. O, Azərbaycanın daha güclü dövlətə çevrilməsinə, müstəqilliyimizin qorunmasına və dövlətçiliyimizin hər bir vətəndaşın rifahına xidmət edən mexanizm kimi inkişafına kömək edir. Bu gün Azərbaycan cəmiyyətində azərbaycançılığa alternativ ola biləcək ikinci bir ideologiya yoxdur. Heç bir siyasi qüvvə və ya ictimai yanaşma azərbaycançılığın birləşdirici mahiyyətini əvəz edə biləcək prinsip ortaya qoya bilməz. Ona görə də bu ideologiyanın gələcək nəsillərə ötürülməsi, gənclərin milli tariximizə, dövlətçilik ənənələrimizə və mənəvi dəyərlərimizə bağlı ruhda yetişdirilməsi xüsusi əhəmiyyət daşıyır.
- Qloballaşma və xarici ideoloji təsirlər şəraitində milli kimliyi və mənəvi dəyərləri necə qorumaq olar?
- Qloballaşma hər zaman mövcud olub və bundan sonra da davam edəcək. Lakin qloballaşma milli kimliyin bu prosesin içərisində əriməsi demək deyil. Əksinə, digər dövlətlərin inkişafına, tərəqqisinə və cəmiyyətin yenilənməsinə töhfə verən müsbət elementlərin milli cəmiyyətə gətirilməsidir. Bu, yeni texnika və texnologiyaların öyrənilməsi, onların düzgün və səmərəli şəkildə tətbiq olunması deməkdir. Bununla yanaşı, qloballaşma cəmiyyətə yeni ideyaların və yanaşmaların daxil olması ilə yanaşı, onu daxildən parçalaya, vətəndaşları qarşı-qarşıya qoya biləcək zərərli elementlərin yayılmasına da şərait yarada bilər. Belə təsirlərin qarşısında dayana biləcək əsas mexanizm isə azərbaycançılıq ideologiyasıdır. Bu, hər bir vətəndaşın öz dövlətinə sevgisi, təhsilin və mədəniyyətin düzgün təşkili, vətəndaşların hüquq və azadlıqlarının qorunması ilə birbaşa bağlıdır. Bütün bu amillər qloballaşmanın müsbət elementlərinin cəmiyyətimizə inteqrasiyasına, eyni zamanda zərərli təsirlərə qarşı dayanıqlılığın formalaşmasına xidmət edir. Əsas məsələ dünyada baş verən yeniliklərdən kənarda qalmamaq, lakin milli kimliyimizi və mənəvi dəyərlərimizi də qorumaqdır. Biz müasir dünyanın inkişaf tendensiyalarını mənimsəməli, bunu öz milli maraqlarımız və dövlətçilik prinsiplərimiz əsasında həyata keçirməliyik.
- Dövlət başçısının Zəfər Günündə Qarabağda səsləndirdiyi “Türkiyə-Azərbaycan birliyi əbədidir və sarsılmazdır” tezisi hazırkı geosiyasi şəraitdə regional və beynəlxalq əhəmiyyət baxımından hansı yeni mərhələyə yüksəlib?
- Ulu Öndər Heydər Əliyevin söylədiyi kimi, Azərbaycan və Türkiyə bir millət, iki dövlətdir. Bizim ortaq tariximiz, mədəniyyətimiz və düşüncə tərzimiz var. Həmişə bir-birimizə yaxın olmuşuq və bundan sonra da belə olacaq. Bizi üz-üzə qoymağa, aramıza nifaq toxumu səpməyə çalışan qüvvələr var. Ancaq görünən odur ki, hər iki ölkənin cəmiyyətləri bu cür cəhdləri qəbul etmir. Sağlam düşüncəli siyasətçilər və ictimai xadimlər dostluğumuzu pozmağa yönələn istənilən addıma qarşı sərt mövqe nümayiş etdirirlər.
- Türkiyə prezidenti Rəcəb Tayyib Ərdoğanın Zəfər Günündə Azərbaycana səfəri dünyaya hansı mesajları verdi?
- Türkiyə Prezidenti Rəcəb Tayyib Ərdoğanın Azərbaycana səfəri də göstərdi ki, bu dostluq və qardaşlıq bundan sonra da möhkəmlənəcək. Onun Azərbaycanla birlikdə Zəfər sevincini yaşaması, mətbuata bəyanatlarında ölkəmizlə dostluğun sarsılmaz olduğunu vurğulaması münasibətlərimizin nə qədər möhkəm olduğunu bir daha sübut etdi. Bizim dostluğumuz əbədidir və bundan sonra da hər zaman bir yerdə olacağıq. Türkiyə Prezidentinin Qarabağda qarşılanması da xüsusi simvolik məna daşıyır. Qarabağ uzun illər Azərbaycan üçün ağrılı problem olub. Ermənistanın torpaqlarımızın bir hissəsini işğal etməsi və həmin əraziləri viran qoyması xalqımızın heç vaxt qəbul etmədiyi, uzun müddət davam edən bir problem idi. Lakin milli birliyimiz, düzgün daxili və xarici siyasətimiz sayəsində bu ağır problemi arxada qoyduq. Artıq altı ildir ki, Azərbaycan öz ərazi bütövlüyünü bərpa edib və həmin ərazilərdə genişmiqyaslı quruculuq işləri həyata keçirir. Bu prosesdə Türkiyənin iştirakı da kifayət qədər böyükdür. Azərbaycana səfər edən Türkiyə Prezidenti əldə etdiyimiz uğurlara sevindiyini və ölkəmizlə birgə fəaliyyət göstərməyə hər zaman hazır olduğunu bəyan etdi. Bütün bunlar bir daha göstərir ki, Azərbaycan və Türkiyə qardaşlığı sevincdə də, kədərdə də həmişə bir yerdə olub və bundan sonra da belə olacaq. Bu birlik yalnız iki ölkənin münasibətləri baxımından deyil, bütövlükdə regionda sabitliyin, təhlükəsizliyin və əməkdaşlığın möhkəmləndirilməsi baxımından da mühüm əhəmiyyət daşıyır.
Ayhan
14:45 10.11.2026
Oxunuş sayı: 45
