Bəhreyndə dənizin altında gizli təyyarə şəhəri yaradılıb
Bəhreyn hakimiyyəti istismardan çıxarılan Boeing 747 sərnişin təyyarəsini sualtı parka çevirərək dəniz canlıları üçün yeni yaşayış məkanı yaradıb.
Crossmedia.az bu barədə “Times of India”ya istinadən xəbər verir ki, 2019-cu ildə 70 metr uzunluğundakı nəhəng təyyarə metal tullantısına çevrilməkdən xilas edilib.
Təyyarə açıq dənizə aparılaraq 20-22 metr dərinliyə endirilib və Dive Bahrain sualtı tematik parkının əsas obyektlərindən birinə çevrilib.
Mütəxəssislər təyyarənin təhlükəsiz şəkildə dənizin dibinə yerləşdirilməsi üçün əvvəlcədən xüsusi hazırlıq işləri aparıblar. Konstruksiya zərərli maddələrdən təmizlənib və ətraf mühit üçün təhlükəsiz vəziyyətə gətirilib.
Hazırda təyyarənin gövdəsindəki boşluqlar balıq sürüləri üçün sığınacaq rolunu oynayır. Qanadlar və gövdə üzərində isə zamanla mərcan koloniyaları və müxtəlif dəniz orqanizmləri yaranmağa başlayıb.
Alimlər bildirirlər ki, süni riflər düzgün seçilmiş məkan və təhlükəsiz materiallardan istifadə edildikdə təbii ekosistemlər qədər dəniz canlılarını cəlb edə bilər. Lakin yalnız böyük bir konstruksiyanın suya batırılması avtomatik olaraq yeni rifin yaranmasına zəmanət vermir.
Bəhreynin sualtı parkı 8 sentyabr 2019-cu ildə fəaliyyətə başlayıb. Gələcəkdə layihəyə süni mərcan rifləri, heykəllər və ölkənin mirvari ticarəti tarixini simvolizə edən ənənəvi tacir evinin surətinin əlavə edilməsi planlaşdırılır.
Hakimiyyət hesab edir ki, park həm sualtı turizmi inkişaf etdirəcək, həm də okeanoloqlar üçün açıq tədqiqat laboratoriyası rolunu oynayacaq.
18:10 22.08.2026
Oxunuş sayı: 65
