Fəlakətin qarşısı alınmalıdır: ABŞ və NATO-ya çağırış
ABŞ və NATO Rusiyaya qarşı müharibədə Ukraynaya yardım göstərmək üçün daha sürətli addımlar atmalıdır.
Crossmedia.az bu barədə ˝Unian˝-a istinadən xəbər verir.
“Forbes” Media-nın baş redaktoru Stiv Forbs bildirib ki, xüsusilə hazırda Rusiya Prezidenti Vladimir Putin Kiyevin hava hücumundan müdafiə imkanlarında yaranan çatışmazlıqlara görə qələbəyə ümid edir.
Forbs öz köşə yazısında qeyd edib ki, ABŞ və NATO müttəfiqləri yaxınlaşan fəlakətin qarşısını ala bilər və almalıdır.
Onun sözlərinə görə, Rusiyanın hava hücumlarının artmasına baxmayaraq, Ukrayna 2026-cı ildə əvvəlki ilin eyni dövrü ilə müqayisədə yalnız üçdə bir qədər raket əleyhinə döyüş sursatı əldə edib.
Forbs vurğulayıb ki, Rusiyanın ballistik raketlərini effektiv şəkildə vura bilən “Patriot” sistemləri üçün də ələkeçirici raketlər çatışmır. Bundan əlavə, Ukraynanın F-16 qırıcı parkı vəd edilən 79 təyyarə əvəzinə cəmi 39 ədəddən ibarətdir və bu təyyarələr “Şahid” dronlarının qarşısını almaq üçün istifadə olunur.
Onun fikrincə, Rusiya da öz taktikasını dəyişir. Yeni reaktiv Şahid dronları daha yüksək sürətlə hərəkət edir və Ukraynanın bəzi dron-ələkeçiriciləri onları izləməkdə çətinlik çəkir. Eyni zamanda, Moskva ballistik və qanadlı raket istehsalını artırır.
Ukraynanın müdafiə sənayesinə və enerji infrastrukturuna zərbə
Forbes yazıb ki, Kremlin iki əsas məqsədi var:
Ukraynanın öz ballistik raket istehsal imkanlarını zəiflətmək üçün strateji obyektlərə daha çox raket zərbələri endirmək;
Qış öncəsi enerji infrastrukturunu sıradan çıxarmaqla ölkəni istilik və elektrik enerjisindən məhrum etmək.
Onun sözlərinə görə, xəstəxanalar, dəmir yolları, məktəblər və kommersiya obyektləri də hədəflər sırasındadır.
“Putin hesab edir ki, bu cür genişmiqyaslı zərbələr Ukraynanın müqavimət iradəsini qıracaq və ölkəni Kreml qarşısında təslim olmağa məcbur edəcək”, - deyə Forbes bildirib.
ABŞ-a çağırış: Patriot və F-16 tədarükü artırılmalıdır
Forbes hesab edir ki, Vaşinqton Ukraynaya “Patriot” sistemləri üçün ələkeçirici raketlərin tədarükünə dərhal üstünlük verməli və onların istehsalını sürətləndirməlidir.
O, həmçinin ABŞ Prezidenti Donald Trampın Ukraynaya “Patriot” kompleksləri və raketlərinin istehsalı üçün lisenziya veriləcəyi barədə vədini xatırladıb və bu vədin yerinə yetirilməli olduğunu bildirib.
“Ukrayna xaricdən tam asılı olmamalıdır, ölkə daxilində ələkeçirici raketlər istehsal edə bilməlidir”, - Forbs qeyd edib.
Baş redaktor ABŞ-ıni Ukraynaya 50 və ya daha çox F-16 qırıcısı göndərməsini təklif edib.
“Bu, çətin olmamalıdır. ABŞ-ın 800-dən çox F-16 təyyarəsi var. NATO da öz ehtiyatlarından 30 və ya daha çox belə təyyarə təqdim etməlidir”, - deyə o bildirib.
Avropaya çağırış
Forbes hesab edir ki, Belçika, Danimarka, Niderland, Norveç və Almaniya kimi Avropa ölkələri də Ukraynaya əlavə raket sistemləri göndərməlidir.
O, həmçinin Avropanı Kiyevin 2026-cı il üçün tələb etdiyi 70 milyard dollarlıq yardım paketini maliyyələşdirməyə çağırıb.
“Razılaşdırılmış və sabit maliyyələşmə ən azı texnika qədər vacibdir”, - deyə Forbes bildirib.
Onun fikrincə, qırıcı təyyarə tədarükünün azalması və Rusiya hava hücumlarının artması bu qış Ukrayna mülki əhalisinə ciddi zərbə vura bilər.
“Effektiv addımlar indi atılmalıdır. Ukraynanın müdafiəsi, nəticə etibarilə, bizim də müdafiəmizdir”, - deyə Stiv Forbs yekunlaşdırıb.
23:52 12.08.2026
Oxunuş sayı: 44
