Qəzzaya 20 000 əsgər və 12 000 polis yeridilir
Beynəlxalq sabitləşdirmə qüvvələri yaxın günlər və həftələr ərzində Qəzza zolağında yerləşdirilməyə başlaya bilər.
Crossmedia.az xəbər verir ki, bu barədə Sülh Şurasının Qəzza üzrə ali nümayəndəsi Nikolay Mladenov “The National” qəzetinə açıqlamasında bildirib.
Onun sözlərinə görə, sabitləşdirmə qüvvələrinin formalaşdırılması prosesi artıq yekun mərhələyə daxil olub və qoşunların yerləşdirilməsi mərhələsi tezliklə start götürəcək.
Keçən həftə qüvvələrin komandanı Jasper Jeffers açıqlayıb ki, Albaniya, İndoneziya, Qazaxıstan, Mərakeş və Kosovo kontingentə qoşun göndərəcək. Bundan əlavə, Misir və İordaniya polis qüvvələrinin hazırlanmasına dəstək verəcək.
Jeffers bildirib ki, yekunda 20 min əsgər və 12 min polis əməkdaşı anklavda təhlükəsizliyin təmin olunmasına cəlb ediləcək.
Mladenov daha əvvəl 2 min yerli sakinin keçid dövründə Fələstin polis qüvvələrinə könüllü qoşulacağını demişdi. Son açıqlamasında isə o qeyd edib ki, qoşulmaq istəyənlərin sayı artıb və onların hazırlıq prosesi Misirdə keçiriləcək.
18:46 24.02.2026
Oxunuş sayı: 575
