İlahiyyat İnstitutunda şəhidin həyatından bəhs edən film nümayiş olunub
Azərbaycan İlahiyyat İnstitutunda (Aİİ) 27 Sentyabr – Anım Günü ilə əlaqədar tədbir keçirilib. Tədbirdə şəhid Rəşad Zeynallının ailəsi, Aİİ-nin və Bakı İlahiyyat Kollecinin kollektivi iştirak edib.
İnstitutdan Crossmedia.az-a bildirilib ki, şəhidlərin ruhunun birdəqiqəlik sükutla yad edilməsi ilə başlayan mərasimdə Azərbaycan Respublikasının Dövlət Himni səsləndirilib.
Daha sonra İlahiyyat fakültəsinin II kurs tələbəsi Cəlal Cəfərli tərəfindən şəhidlərimizin ruhuna Quran tilavəti təqdim edilib.
Aİİ rektoru Aqil Şirinov açılış nitqi ilə çıxış edərək, Vətən müharibəsində qəhrəmancasına döyüşmüş, Azərbaycan Bayrağını işğaldan azad olunan torpaqlarımızda dalğalandırmış, ölkəmizin ərazi bütövlüyü yolunda canlarını fəda etmiş əsgər və zabitlərimizi, bütün şəhidlərimizi dərin ehtiramla yad edib.
Rektor Azərbaycan Respublikasının suverenliyi və ərazi bütövlüyü uğrunda gedən mübarizədə Ali Baş Komandan İlham Əliyevin ətrafında birləşərək, məğlubedilməz Ordumuzun, bütövlükdə xalqımızın bir yumruq kimi birlik və həmrəylik nümayiş etdirdiyini nəzərə çatdırıb.
A.Şirinov deyib: “Biz Azərbaycanın necə qüdrətli dövlət, yenilməz xalq olduğunu bütün dünyaya göstərdik”.
Aİİ rəhbəri daha sonra vurğulayıb ki, erməni vandalları tərəfindən dağıdılmış, yerlə-yeksan edilmiş əzəli və əbədi torpaqlarımızda Azərbaycan Respublikasının Prezidenti İlham Əliyevin rəhbərliyi ilə yenidənbərpanın, doğma yurdlarına qayıdan insanların sevincinin şahidi oluruq.
Şəhid atası Qiyas Zeynallı oğlu Rəşad Zeynallı haqqında məlumat verib, onun haqqında xatirələrini mərasim iştirakçıları ilə bölüşüb.
Tədbirdə şəhid Rəşad Zeynalının həyatından bəhs edən “Rəşadətli ömür” filmi nümayiş olunub. Film şəhid Rəşad Zeynallının valideynlərinin arzusu, məktəb kollektivinin təşəbbüsü, Bakı Şəhəri üzrə Təhsil İdarəsinin və Yasamal Rayon İcra Hakimiyyətinin dəstəyi ilə çəkilib.
Filmin ideya müəllifi Emilya Səfərəliyeva, quruluşçu rejissoru Elmar Əli Oruc, ssenari müəllifi Çimnaz Ağakişiyevadır.
17:38 26.09.2025
Oxunuş sayı: 5106
