Elmi tədqiqat işlərinin aparılması üçün laboratoriya şəraitini və infrastruktur imkanlarını yaxşılaşdırmaq lazımdır -AÇIQLAMA
Azərbaycan universitetləri arasında tədqiqatlarla bağlı əlaqələr qənaətbəxş olsa da, bu, daha da genişləndirilməlidir. Bu fikri Elm və Ali Təhsil üzrə Dövlət Agentliyinin direktoru Ülkər Səttarova jurnalistlərə açıqlamasında deyib. "Müəyyən beynəlxalq səviyyəli tədbirlər vasitəsi ilə bunu alimlərimiz üçün daha da əlçatan etməyə çalışırıq". Ülkər Səttarova əlavə edib ki, hökumətlərarası təqaüd proqramı vasitəsi ilə, həm də dövlət proqramı vasitəsi ilə tələbələr xaricdə təhsil alırlar: "Eyni zamanda əcnəbi tələbələrin də Bakıda qrantla təhsil almasına imkan yaradılır. Elm və Təhsil Nazirliyi olaraq dəstək oluruq. Xatırladım ki, Azərbaycana əcnəbi tələbələr öz istəkləri ilə gəlir və hazırda onların sayı 11 minə yaxındır".
Məsələ ilə bağlı Crossmedia.az-a açıqlama verən təhsil üzrə ekspert Elçin Əfəndi elmi laboratoriyaların fəaliyyətində zəifliyin əsas səbəbi kimi universitetlərdə şəraitin olmamasını qeyd edib: "Ölkəmizdə fəaliyyət göstərən bir neçə ali təhsil müəssisəsində demək olar ki, yalnız elmi-tədqiqat işlərinin aparılması ilə bağlı həm laboratoriya şəraiti, həm də elmi infrastruktur baxımından müəyyən imkanlar mövcuddur. Təəssüf ki, bu imkanlar bütün ali məktəblərdə eyni dərəcədə təmin olunmayıb.
Ona görə də, direktorun dediyi kimi, biz çalışmalıyıq ki, bu məsələlərdə əməli addımlar ataq, elmi tədqiqat işlərinin aparılması üçün laboratoriya şəraitini və elmi infrastruktur imkanlarını yaxşılaşdıraq. Təbii ki, bununla yanaşı, xarici ölkələrin ali təhsil müəssisələri ilə əməkdaşlığın, birgə tədqiqatların aparılmasının da əhatə dairəsi genişləndirilməlidir ki, ümumi inkişaf təmin olunsun".
Ekspert müəyyən vasitələrlə laboratoriyaların fəaliyyətini inkişafının mümkün olduğunu bildirib.
"Yalnız bu halda biz beynəlxalq səviyyəli tədbirlər təşkil edərkən və ya elmi tədqiqat aparan alimlərimizi xarici ölkələrə təlim və ya tədqiqat məqsədilə göndərərkən, müəyyən yenilikləri ölkəmizə gətirə bilərik. Dediyim kimi, ölkəmizdə müvafiq şəraiti yaratsaq, həm xarici alimlərin ölkəmizdə elmi tədqiqat aparmasına təkan vermiş, həm də öz vətəndaşlarımızın xarici ölkələrdə mübadilə və birgə elmi fəaliyyət imkanlarını artırmış olarıq"- deyə o qeyd edib.
Elmir Heydərli
15:35 25.09.2025
Oxunuş sayı: 5681
