“Şagird Davranış Qaydaları” tətbiq olunmağa başlayır - nəzarət gücləndirilir
Yaxın günlərdə şagird davranış qaydalarının ölkənin bütün ümumi təhsil müəssisələrində tətbiqinə başlanılacaq.
Bu barədə Məktəbəqədər və Ümumi Təhsil üzrə Dövlət Agentliyinin (MÜTDA) məlumat yayıb.
Məlumata görə, bu günə qədər qaydaların 300 ümumi təhsil müəssisəsində tətbiq edildiyini qeyd edib. E.Bağırov yeni qaydalara misal kimi şagirdlərə tədris vaxtı telefon vasitələrindən istifadəyə qadağanı göstərib.
Maraqlıdır bəs bu qaydalar dedikdə tam olaraq nələr nəzərdə tutulur bu qaydaların effektivliyi nə dərəcədə olacaq?
Məsələ ilə bağlı Crossmedia.az-a açıqlama verən elm və təhsil məsələləri üzrə mütəxəssis Elçin Əfəndi artıq bu layihənin 2025-2026-cı dərs ilindən bu qaydaların bütün təhsil müəssələrini əhatə edəcəyini qeyd edib:
"Ötən gündən etibarən “Şagird Davranış Qaydaları” artıq pilot layihə çərçivəsində bəzi təhsil müəssisələrində tətbiq olunmağa başlanıb. 2025–2026-cı dərs ilindən isə bu qaydalar bütün təhsil müəssisələrini əhatə edəcək.
Sənəddə şagirdlərin hüquq və vəzifələrini tənzimləyən müddəalar, həmçinin onların davranış səviyyələrinin müəyyənləşdirilməsi və qayda pozuntularına görə tədbirlər nəzərdə tutulub. Qaydalar altı bölmədən ibarətdir və buraya həm profilaktik, həm də rəhbətləndirici tədbirlər daxildir.
Əsas müddəalara görə, şagird dərslərə vaxtında gəlməli, dərs bitənədək məktəbi tərk etməməli, iştirak faizi 96%-dən aşağı olmamalıdır. Qanuni səbəblərlə buraxılan dərslər valideynin izahatı və ya rəsmi arayışla təsdiqlənməlidir. Müəllimin icazəsi olmadan dərs zamanı sinfi tərk etmək qadağandır.
Qaydalar həmçinin şagirdlərin geyim və şəxsi gigiyenasına dair tələbləri də əhatə edir: geyim səliqəli və təmiz olmalı, qısa və yaxud çox dar geyimlər, zinət əşyaları, qeyri-adi saç forması və rəngi, uzun və rəngli dırnaqlar, makiyaj qadağandır.
Təhsil müəssisəsinə mobil telefon, təsbeh, kəsici-deşici alətlər, siqaret, elektron siqaret, spirtli içki və digər zərərli vasitələrin gətirilməsi də qəti şəkildə qadağan olunub".
Elspert həmçinin bu qaydalara riayət olunmasının həm məktəb həm də valideynlərin məsuliyyəti olduğunu qeyd edib.
"Bu qaydalara riayət olunması həm məktəb rəhbərliyi, həm də valideynlərin məsuliyyətidir. Pozuntu hallarında isə davranış qaydalarında nəzərdə tutulmuş üç səviyyəli cəza mexanizmi – yüngül, orta və ağır intizam tədbirləri tətbiq olunacaq" - deyə o bildirib.
Elmir Heydərli
14:50 13.09.2025
Oxunuş sayı: 1191
