BDU ilə Bartın Universiteti arasında ikili diplom proqramlarına dair fikir mübadiləsi aparılıb
Bakı Dövlət Universitetinin İnformasiya və sənəd menecmenti fakültəsinin dekanı dosent Ələmdar Cabbarlı Türkiyə Cümhuriyyətinin Bartın Universitetində olub. Fakültə dekanı səfər çərçivəsində Bartın Universitetinin rektoru professor Ahmet Akkaya ilə görüşüb.
BDU-dan Crossmedia.az-a bildirilib ki, görüşdə rektora ölkəmizdəki təhsil mühiti, BDU-nun tarixi və bu günü, eyni zamanda, fakültə barədə məlumat verilib. Bartın Universitetinin İnformasiya və sənəd menecmenti bölümü ilə BDU-nun İnformasiya və sənəd menecmenti fakültəsi arasında əməkdaşlığın müxtəlif platformalarda inkişaf etdirildiyi, indiyə qədər birgə beynəlxalq elmi konfransların, ustad dərsləri və elmi seminarların keçirildiyi diqqətə çatdırılıb.
Rektor Ahmet Akkaya BDU ilə əməkdaşlığı yüksək qiymətləndirib. Bartın Universitetinin Ədəbiyyat fakültəsinin İnformasiya və sənəd menecmenti bölümünün rəhbəri dosent Ahmet Altayın da iştirak etdiyi görüşdə fakültələr arasındakı əməkdaşlığın daha da inkişaf etdirilməsi, o cümlədən akademik mübadilə proqramlarının əhatə dairəsinin genişləndirilməsi, birgə layihələrin həyata keçirilməsi, elmi araşdırmaların aparılması, ikili diplom proqramlarının mümkünlüyü ilə bağlı geniş fikir mübadiləsi aparılıb. Görüşdə, həmçinin 2026-cı ilin mart ayında Bartın Universitetinin ev sahibliyi ilə birgə beynəlxalq tələbə elmi konfransının təşkil edilməsi təklifi irəli sürülüb.
17:25 21.08.2025
Oxunuş sayı: 15541
