Ənənəvi ixtisaslarla rahat iş tapmaq çətindir — AÇIQLAMA
Son illərdə ixtisas seçimi abituriyentlər üçün sadəcə akademik maraqlara əsaslanan qərar deyil, həm də gələcək əmək bazarına strateji baxış tələb edən bir prosesə çevrilib. Texnologiyanın sürətli inkişafı, süni intellektin həyatın müxtəlif sahələrinə nüfuz etməsi və qlobal iqtisadiyyatın dinamikası bir çox ənənəvi peşələrin aktuallığını kölgədə qoyur. Artıq kompüter mühəndisliyi, data analitikası, kiber təhlükəsizlik kimi sahələr yalnız texniki bilik deyil, həm də çevik düşüncə və adaptasiya bacarığı tələb edir.
Təbii ki, istənilən sahədə uğur qazanmaq üçün yalnız ixtisas seçimi kifayət etmir. Müasir cəmiyyətin tələbləri abituriyentlərdən kritik düşüncə, tənqidi təhlil, komanda işi və psixoloji dayanıqlılıq kimi bacarıqlara sahib olmağı tələb edir.
Mövzu ilə bağlı Crossmedia.az-a açıqlama verən təhsil eksperti Elçin Süleymanov bildirib ki, ixtisaslar günün, zamanın tələbinə görə dəyişir: “Son illərdə daha çox texniki və texnoloji ixtisaslara – kompüter mühəndisliyi, kiber təhlükəsizlik, data analitikası və s. – maraq artır. Eyni zamanda, Azərbaycan üçün bir başqa prioritet ixtisaslar intensiv kənd təsərrüfatı ilə əlaqəli istehsal zənciri, logistika, tibb ilə əlaqəli ixtisaslar, fizioterapiya və s.-dir. Amma ümumdünyada tendensiya odur ki, hər il ixtisaslar, müəyyən xüsusi ilə də süni intellekt və s.-dən təsirlənərək, müəyyən bir hissəsi aktuallığını itirir. Yeni ixtisaslar, yeni iş yerləri də açılır. Ona görə də artıq ənənəvi ixtisaslarla rahat iş tapmaq bir az çətindir. Çünki rəqabət var. Cəmiyyət inkişaf edir. İxtisaslarla yanaşı, müəyyən bacarıqlar da əhəmiyyətlidir. Bunlar kritik düşüncə, tənqidi təfəkkür, kollektivlə işləmək bacarığı, stressə dayanıqlılıq və s.-dir. Yəni abituriyentlər sadəcə ixtisas yox, o ixtisasın kaufaliklərimi də düşünərək ixtisas seçməlidir. Bu kaufaliklər onların bacarıq, qabiliyyət və psixologiyasına uyğun olmalıdır”.
Nigar Mustafa
11:31 12.08.2025
Oxunuş sayı: 9248
