Üfüqdə gözlənilən dəhşətli müharibə: ABŞ ordusu Yəmənə girəcəkmi?
ABŞ-nin Yəmən ərazisinə hava hücumları nəticəsində azı 22 nəfər ölüb, onlarla insan yaralanıb. Bu barədə Yəmənin "Ənsar Allah" hərəkatından olan husilərin nəzarətində olan "Al Masirah" telekanalı məlumat yayıb. Məlumata görə, bombardman cümə günü gecə Qırmızı dəniz sahilində yerləşən Ras-İsa limanı neft terminalının yerləşdiyi Əl-Hodeyda əyalətində olub. Qeyd olunur ki, 17 fəhlə və xidmətçi, həmçinin 5 təcili yardım işçisi həlak olub. Limanda güclü yanğın baş verib, yanğınla mübarizə hələ də davam edir. Əl-Hodeydanın qubernatoru Abdullah Oteyfi deyib ki, ABŞ-nin cinayətkar təcavüzü yalnız mülki infrastrukturun obyekti olan Ras-İsa limanına yönəlib. O, vurğulayıb ki, ABŞ-nin hərəkətləri Yəmən xalqını Qəzza zolağında fələstinlilərə dəstək verməkdən imtina etməyə məcbur etməyəcək. Əslində isə ABŞ - nin ilk məqsədi İranın bölgədəki gücünü yox etməkdir.
Artan gərginlik barədə Crossmedia.az-a danışan siyasi ekspert Zeynal Əmraliyev deyib ki, ötən il İsrail bu məsələdə xeyli irəliləyiş əldə edib: HƏMAS və Hizbullah liderlərinin öldürülməsi, eyni zamanda bu təşkilatlara qarşı davamlı şəkildə keçirilən əməliyyatlar İranın bölgədəki əsas proksilərinin ciddi şəkildə zəifləməsinə səbəb oldu. Hazırda müttəfiqlərin əsas hədəfi Qəzza bölgəsinə elə keçirərək HƏMAS-ın varlığına son qoymaq və bundan sonra Hizbullahı sıxışdırıb məhv etməkdir. Suriyada Əsəd rejimi hakimiyyətdən devrildikdən sonra Hizbullahın İranla quru əlaqəsində ciddi problem yaranıb. Buna görə də silah təchizatını lazımınca yerinə yetirə bilmir. HƏMAS-ın da sıradan çıxarılması Hizbullah üçün ciddi itki deməkdir. ABŞ və İsraili ən çox narahat edən isə husilərdir. İlk növbədə İsrail bu müddət Hizbullah və HƏMAS-dan fərqli olaraq husilərə ciddi zərbə vura bilmədi".
O bildirib ki, hazırda Hizbullah və HƏMAS-ın İranla arasındakı əlaqələri təmin edən əsas yol məhz husilərin nəzarəti altındadır: "Buna görə də hazırda ABŞ hazırda bu təşkilatı sıradan çıxarmaq istəyir. İkincisi isə əgər İrana qarşı hücum olarsa husilərin ABŞ müttəfiqi olan Körfəz ölkələrini və İsraili vura bilər. İrandan öncə husilərin sıradan çıxarılması ABŞ üçün vacibdir. Ancaq Hizbullah və HƏMAS-dan fərqli olaraq husilərə qarşı quru əməliyyatı bir qədər təhlükəlidir. Çünki digər iki təşkilatdan fərqli olaraq Ənsurullah qruplaşması bir - birinə yaxın qohum olan qəbilələrin birləşməsidir. Onlar ideologiyadan daha çox sıx qohumluq bağlayır. Belə olan halda husilərə parçalamaq çətin məsələdir. Xüsusilə nəzərə alaq ki, Ərəbistan yarımadasında qan qohumluğu mühüm əhəmiyyət kəsb edir. Bu baxımdan ABŞ - nin Yəmənə qoşun göndərmək qərarı 21 - ci əsrin tarixinə ən dəhşətli müharibələrdən biri kimi düşə bilər".
Kənan Novruzov
13:20 22.04.2025
Oxunuş sayı: 1061
