İran yüksək hazırlıq səviyyəsinə gətirilir: Növbəti gərginlik riski
Britaniyanın "Telegraph" qəzeti ölkə hökumətindəki yüksək vəzifəli mənbələrə istinadən yazıb ki, İran əsas nüvə və raket obyektlərinin yaxınlığında müdafiə sistemlərini yüksək hazırlıq vəziyyətinə gətirib.
Qəzet yazır ki, İran İsrail və ABŞ-ın mümkün hücumundan ehtiyat edərək bu addımı edib: "İran əsas nüvə və raket obyektləri ətrafında müdafiəni gücləndirir, o cümlədən əlavə hava hücumundan müdafiə qurğularının yerləşdirir. Rəsmilər bu tədbirlərin İsrail və ABŞ arasında mümkün birgə hərbi fəaliyyətlə bağlı artan narahatlıqlara cavab olduğunu bildirir".
Mənbələrdən biri qeyd edib ki, İranın nüvə obyektlərinin gücləndirilməsi üzrə işlər uzun illərdir davam edir, lakin son bir ildə xüsusilə İsrailin ilk hücumunu həyata keçirdikdən sonra daha da intensivləşib.
Səslənən iddialar barədə Crossmedia.az-a danışan Orta Doğu Araşdırmalar Mərkəzinin sədri, siyasi şərhçi Sədrəddin Soltan bildirib ki, İranın fundamental ideologiyası və beynəlxalq ictimaiyyətin Tehran hakimiyyətinin nüvə proqramı ilə bağlı narahatlıqları bu gərginliyin əsas səbəblərindəndir: “İranın fundamental şüarlarından biri İsrailə və ABŞ-yə qarşı düşmənçilik mövqeyidir. Bu ideoloji yanaşma Tehran hakimiyyətinin gündəliyindən çıxmayana qədər İsrail-İran münasibətlərində gərginlik daimi olacaq. Bundan əlavə, İranın nüvə proqramı ilə bağlı beynəlxalq ictimaiyyət şübhələr var. Atom Enerjisi üzrə Beynəlxalq Agentlik belə İranın nüvə silahı əldə etmədiyinə dair birmənalı hesabat verməyib”.
O, əlavə edib ki, İranın İsrailə qarşı raket hücumları və bu hücumların davam etdiriləcəyi ilə bağlı açıqlamaları regionda müharibə riskini artırır: “Buna cavab olaraq İsrail və ABŞ da Tehran hakimiyyətinin nüvə obyektlərinə qarşı hərbi əməliyyat ehtimalını gündəmə gətirir. İran HƏMAS, Hizbullah təşkilatlarından, həmçinin Suriyanın keçmiş prezidenti Bəşər Əsəd rejimindən sonra növbəti hədəf ola biləcəyini düşündüyü üçün öz hərbi qüvvəsini nümayiş etdirərək qarşı tərəfə xəbərdarlıq ismarışları göndərir. Tərəflər danışıqlar masası arxasına oturmayana qədər bu gərginlik davam edəcək”.
Fidan Xəlilova
19:51 25.02.2025
Oxunuş sayı: 6225
